७० दिनमा सकियो ‘प्रेमगन्ज’, भ्यालेन्टाइन प्रदर्शन लक्ष्य

काठमाडौँ - महामारीको दोस्रो लहरमा परेर रोकिएको फिल्म ‘प्रेमगन्ज’ले सुटिङ सकेको जानकारी गराएका छन् । निर्देशक परिच्छेद सेनले क्यामरा चलेको दिन गन्ति गरेर ७० मा छायांकानको काम सकिएको जानकारी गराएका छन् । 

वैशाखमा फ्लोरमा गएको फिल्म यसको केही समयपछि नै आएको महामारी र सरकारले गरेको लकडाउनका कारण रोकिन बाध्य भएको थियो । खुलेपछि सुटिङ फिल्मलाई बेलाबखत क्यामराले पनि धोका दिएको थियो । सुटिङ गरिरहेको समयमा नै क्यामराले काम नगरेपछि पनि सुटिङलाई बाधा पुगेको परिच्छेदले इकागजलाई बताए । 

---

फिल्ममा नव प्रवेशी तेज गिरीसँग बेनिशा हमाल र सम्पदा बानियाँले रोमान्स गरेका छन् । यीबाहेक फिल्ममा नरेश पौडेल, सुप्रिया खनाल, राइडर प्रशान्त, सिमरन खड्का, आरुषी खड्का आदि कलाकारको अभिनय रहेको छ । 

सञ्जय लामाको छायाँकान रहेको फिल्मलाई निर्देशक परिच्छेद स्वयंले लेखेका हुन् । २५ वर्षदेखि स्पटब्वाईको रुपमा काम गरिरहेका राजु फुयालले निर्माण गरेको  फिल्म प्रेम दिवसको छेको पारेर फागुनमा रिलिज गर्ने सोच रहेको परिच्छेदले बताए । ‘यो मितिमा पोस्ट प्रडक्सनको काम सकिएन भने अर्को वर्षको सुरुमा नै रिलिज गर्न सक्छौँ,’ परिच्छेदले भने ।