लसएन्जल्स - ‘स्पाइडर मेन’, ‘ब्ल्याक विडो’ तथा ‘भेनम’को सुखद व्यापारका बाबजुद अमेरिकाको घरेलु फिल्म बजार लयमा आउन नसकेको कमस्कोरको रिपोर्टले देखाएको छ । कमस्कोरका अनुसार सन् २०२१ मा फिल्मको व्यापार ४ अर्ब ४ करोड अमेरिकी डलर पुगे पनि उद्योगले महामारी अघिको तुलनामा फिल्मको व्यापार घटेको छ । 

कमस्कोरले अघिल्लो वर्षको तुलनामा घरेलु फिल्मको बजार ९१ प्रतिशतले बढेको तथ्यांक पेस गरेको छ । तर महामारी यता टिकट बिक्रीको अनुपात ४० वर्षयताकै कम भएको जनाएको छ । सन् २०२० मा फिल्मको व्यापार २ अर्ब २ करोड मात्र भएको पनि कमस्कोरले बताएको छ । 

---

सन् २०१९ मा फिल्मको व्यापार ११ अर्ब ३९ करोड अमेरिकी डलर थियो । यो सालको आँकडा तुलना गर्दा सन् २०१९ को भन्दा ६१ प्रतिशत कम भएको छ ।
सन् २०१९ मा ‘एभेन्जर एन्डगेम’, ‘दि लायन किङ’, ‘टोय स्टोरी ४’ आदिले ऐतिहासिक कमाइ गरेका थिए । सन् २०१९ मा भन्दा २०२०मा फिल्मको व्यापार ८० प्रतिशत कम भएको थियो । 

यो साल तीन खाले फिल्मले दर्शक पाएको कमस्कोरका विश्लेषकको विश्लेषण छ । यो साल सुपरहिरो, फ्रेन्चाइज र फेमिली फिल्मले दर्शक पाएको उनीहरूको अनुमान छ ।