‘आरआरआर’ सरे पनि प्रभासको ‘राधेश्याम’ नसर्ने

मुम्बई - नसर्ने जिद्दी गरेर बसेको ‘आरआरआर’ले पनि अन्तिम समयमा हिम्मत हारेपछि फिल्म रिलिजको क्यालेन्डर फेरि तहसनहस भएको छ । ‘आरआरआर’ सरेसँगै यसको अर्को हप्ता रिलिज हुने तरखरमा रहेको ‘राधेश्याम’ पनि शंकाको घेरामा रहेको छ ।

प्रभास र पूजा हेगडेको मुख्य भूमिका रहेको यो तेलगु फिल्म पनि सर्छ कि भन्ने अनुमान चलिरहेका बेला निर्माता युभी क्रिएसन्सले भने फिल्म पूर्व निर्धारित मितिमा नै आउने घोषणा गरेको छ । फिल्म सर्छ भन्ने हल्ला चिर्न निर्माताले आइतबार नयाँ पोस्टर जारी गरेका छन् जसमा प्रदर्शन मिति जनवरी १४ नै राखिएको छ । 
निर्माताले योसँगै हल्लाको पछि नलाग्न र जनवरी १४ मा फिल्म हेर्न आउन आग्रह पनि गरेका छन् । 

---

प्रभास र पूजा हेगडेको प्रेमकथामा आधारित यो फिल्मको ट्रेलरले कीर्तिमानी दर्शक पाएको थियो । ट्रेलरपछि दर्शकले यसलाई हलिउड फिल्म ‘टाइटानिक’सँग तुलना गरेका छन् । फिल्ममा प्रभासले हात हेरेर भविष्यवाणी गर्ने पाल्मिस्टको भूमिका निर्वाह गरेका छन् ।