शाहरुखको यो फिल्मको रिमेकमा काम गर्न चाहान्छिन् सारा

मुम्बई - ‘अतरंगी रे’बाट सारा अली खानले कहिलै नपाएको चर्चा पाएकी छिन् । धनुष र अक्षयकुमार जस्ता दिग्गज अभिनेताको बीचमा पनि सारा अली खानले आफूलाई प्रमाणित गरेको भन्दै उनको प्रशंसा भइरहेको छ ।  ‘केदारनाथ’ र ‘सिम्बा’ हिट भए पनि ‘कुली नं वन’ र ‘लभ आजकल २’ फ्लप भएपछि सारालाई धक्का लागेको थियो । तर ‘अतरंगी रे’ले उनलाई धेरथोर राहत दिएको छ ।

‘कुली नं वन’मा करिष्मा कपुरले निर्वाह गरेको भूमिका निर्वाह गरेकी सारालाई हालसालै अर्को कुन फिल्मको रिमेकमा काम गर्न मन छ भनेर सोधिएको थियो । जवाफमा साराले शाहरुख खानको फिल्मको नाम लिएकी छिन् ।

---

साराले आफूलाई शाहरुख, काजोल र रानी मुखर्जीको अभिनय रहेको ‘कुछ कुछ होता है’मा काम गर्न मन भएको बताएकी छिन् । साराले यसका लागि आफू मात्र होइन बाँकी कलाकार पनि को को भए राम्रो हुने बताएकी छिन् । साराले शाहरुखको भूमिकामा विजय देवकोरान्डा र रानी मुखर्जीले गरेको भूमिकाका लागि जान्हवी कपुर लिएर फिल्म बनाए गज्जब हुने पनि उनको धारणा थियो । साराले पहिलेदेखि नै आफू विजय देवकोरान्डाको फ्यान रहेको बताउँदै आएकी छिन् ।