अमेरिकामा ओम्रिकोन कहर : ग्रामी रोकियो, सन्डान्स भर्चुअल

लसएन्जल्स -विश्वभर फैलिएको कोभिड १९ को तेस्रो लहरले फेरि एक पटक अवार्ड तथा फिल्म फेस्टिभल प्रभावित हुन थालेका छन् । नियमित क्यालेन्डरमा घोषित अवार्ड तथा फेस्टिभल कि त स्थगित हुन थालेका छन् कि भर्चुअल ।

अमेरिकामा ओम्रिकोन संक्रमितको संख्या बढेसँगै अमेरिकामा हुँदै आएको ग्रामी अवार्ड स्थगित भएको छ । आयोजकले तत्कालका लागि यो अवार्ड वितरण गर्न नसकिने जानकारी गराएका छन् । संगीतकर्मी लक्षित यो अवार्ड यही जनवरीको ३१ तारिख हुँदै थियो । 

---

अब यो अवार्ड अप्रिल वा मेमा मात्र आयोजना गर्न सकिने सम्भावना बताइएको छ । कोभिडको त्रास कम भइहाले पनि बीचमा यसको आयोजना हुने हल खाली नहुने भएकाले आयोजकले त्यो मितिमा मात्र यो अवार्ड गर्न सम्भव भएको बताएका छन् । 

यसैगरी जनवरीकै २० देखि ३० सम्म अमेरिकाको उटाहा राज्यमा हुन गइरहेको सन्डान्स फिल्म फेस्टिभल पनि भर्चुअल हुने भएको छ । अन्यथा यो फेस्टिभल फिल्मकर्मीको उपस्थितिका बीच सम्पन्न गर्नेगरी आयोजना हुँदै थियो । यसअघि नै भाइरसका कारण पाल्म स्प्रिङ फिल्म फेस्टिभल, क्रिटिक्स च्वाइस अवार्ड, गर्भनर अवार्ड आदि समारोह रद्द भइसकेका छन् ।