आइटम गीतमा नाचेको कति लिन्छन् भारतीय हिरोइन ?

मुम्बई -भारतका मसाला फिल्ममा आइटम गीत नहुनु तरकारीमा नुन नहुनु जस्तै मानिन्छ । जतिसुकै ठूला स्टार भएका फिल्म किन नहुन् ? आइटम चाहिन्छ नै चाहिन्छ । सलमान खानदेखि शाहरुख खानसम्म पनि फिल्म चलाउन आइटमको सहारा लिन्छन् ।

हालै ब्लकबस्टर मानिएको अल्लु अर्जुनलाई पनि आइटमविना फिल्म चलाउने हिम्मत थिएन सायद । उनले पनि दक्षिण भारतीय अभिनेत्री सामान्था रुथ प्रभुलाई आइटम गर्न मात्र मनाएनन्, यसका लागि महंगो रकम तिरेको पनि खबर छ । सामान्थाले ‘ओ आन्टभा’ बोलको यो गीतमा नाच्न ५ करोड भारतीय रुपैयाँ लिएको चर्चा छ । सामान्थाले कुनै आइटम गीतमा नाचेको भने यो पहिलो अवसर हो ।

---

बलिउडको कुरा गर्ने हो भने कट्रिना कैफ, सन्नी लियोनी, नोरा फतेही आइटम गीतमा सबैभन्दा चलेका अनुहार हुन् । उनीहरूले ५० लाखदेखि ३ करोडसम्म लिने गरेका छन् ।

कट्रिना कैफले एउटा आइटम गीतमा नाचेको ३ करोडसम्म लिने गरेको एबीपी लाइभले लेखेको छ । उनले ‘धूम ३’अघिसम्म ५० लाख लिने गरेको तर यो फिल्मपछि रकम ह्वात्तै बढाएर ३ करोड पुर्याएको समाचारमा दाबी गरिएको छ । 

पोर्नस्टार सन्नी लियोनीले पनि एउटा गीतमा नाचेको ३ करोड नै लिने समाचारमा बताइएको छ । सन्नीले एउटा नेपाली फिल्ममा पनि आइटम गरेकी छिन् । ‘पासवर्ड’नामको यो फिल्ममा नृत्य गर्न निर्माताले सन्नीलाई १ करोड नेपाली रुपैयाँ तिरेको समाचार आएका थिए । तर सन्नीको आइटमले दर्शकलाई हलसम्म भने तान्न सकेन । 

पछिल्लो समय आइटममा रुचाइएकी अभिनेत्री हुन् नोरा फतेही । पछिल्लो समय चलेका ‘दिलबर’ देखि ‘कमरिया’सम्ममा आइटम प्रस्तुत गरेकी नोराले एउटा गीतमा नाचेवापत ५० लाख लिने गरेकी छिन् । 

फिल्मका आइटममा बाक्लै देखिने अर्को अनुहार हो ज्याकलिन फर्नान्डिजको । मुख्य अभिनेत्रीको रुपमा खासै प्रभाव जमाउन नसकेकी ज्याकलिनले आइटम गीतमा भने राम्रै दर्शक कमाएकी छिन् । निर्माताले यही देखेर उनलाई पनि आइटम गीतमा महंगो रकम तिरेर लिने गरेका छन् । एबीपी लाइभले लेखेको समाचारअनुसार ज्याकलिनले पनि कट्रिनाकै हाराहारी ३ करोडसम्म लिने गरेकी छिन् । 

आइटम सबैभन्दा धेरै चलेकी अर्की अभिनेत्री हुन् मलाइका अरोरा । तर उमेर ढल्कँदै गएकाले आजभोलि उनी निर्माताको रोजाइमा पर्न छाडेकी छिन् । तर आफ्नो समयमा उनले १ करोडसम्म पारिश्रमिक लिने गरेकी थिइन् ।