चैत ११ मा सिनेमाघरमा ‘आरआरआर’

मुम्बई - महामारीका कारण रिलिजको मुखैमा आएर सर्न बाध्य भएको ‘आरआरआर’ले नयाँ प्रदर्शन मिति घोषणा गरेको छ । फ्रेब्रुअरी ७ मा प्रदर्शन हुने घोषणा गरेर प्रचार प्रसारमा मात्र २० करोड खर्च गरेको फिल्म अघिल्लो वर्षको अन्त्यमा सर्न बाध्य भएको थियो । अब यो फिल्म मार्च २५ मा (चैत ११) प्रदर्शन हुनेछ ।

केही दिनअघिसम्म पनि यो फिल्मले मार्च १८ र २५ गरी दुइटा मिति बुक गरेर राखेको थियो । यही बीचमा अक्षयकुमारको ‘बच्चन पाण्डेय’ले मार्च १८ मा आउने घोषणा गरेर पोस्टर निकालेपछि ‘आरआरआर’का सामु ‘बच्चन पाण्डेय’सँग भिड्ने कि नयाँ मितिमा जाने दुई विकल्प बाँकी थिए ।

---

दोस्रो विकल्प रोज्दै फिल्मले एक हप्तापछि सर्ने निर्णय गरेको हो । एसएस राजामौली निर्देशित यो फिल्ममा रामचरण र जुनियर एनटीआरको मुख्य भूमिका रहेको छ । फिल्ममा अजय देवगन र आलिया भट्ट अतिथि भूमिकामा रहेका छन् ।