विल्सन–गौरवको ‘आकासे खेती’को मेलो

काठमाडौँ -आउँदो फागुन २७ गतेबाट प्रदर्शनमा आउन लागेको फिल्म ‘आकासे खेती’ को टिजर सार्वजनिक गरेको छ । फिल्मले प्रदर्शन मिति नजिकिएसँगै प्रचार प्रसारसमेत तीव्र  बनाएको छ ।
यस्तैमा निर्माण युनिटले बुधबार फिल्मको टिजर सार्वजनिक गरेको छ । टिजरमा फिल्मका केही महत्वपूर्ण दृश्यले प्राथमिकता पाएको छ । टिजरमा फिल्मका मुख्य कलाकारहरु गौरव पहारी, विल्सन बिक्रम राई, बुद्धि तामाङ लगायत देखिएका छन् ।
युवाहरूको विना मिहिनेत पैसा कमाउने सपना र भुटानी शरणार्थीको विषयलाई कथा बनाएको फिल्ममा गौरव, विल्सन, बुद्धिका अलवा नीता ढुंगाना, मरिश्का पोखरेल, रविन्द्र झा, जयनन्द लामा र शिशिर वाङ्देलको अभिनय देख्न सकिन्छ ।
केदार उप्रेती, जीवन सुब्बा, राजेन्द्र चोङबाङ, दीलप्रकाश याक्सो निर्माता रहेको फिल्मको कथा निर्देशक उदय सुब्बा आफैंले तयार पारेका हुन् । 
कलाकार विल्सन बिक्रमको सम्वाद रहेको फिल्ममा विक्रम डिसीको छायांकन, सुजन बडालको सम्पादन, राजु किरातीको द्वन्द्व, रामजी लामिछाने र राजिव सिंहको नृत्य, विकाश चौधरी र बादल लिम्बूको संगीत छ । 
फिल्मको निर्देशन उदय सुब्बाले गरेका हुन् । 

---