‘ए मेरो हजुर’को गीत रिलिज कार्यक्रममा श्रीकृष्णको चर्चा

काठमाडौँ - अनमोल केसीले कुनै बेला सिक्वेल फिल्ममा काम नगर्ने घोषणा गरेका थिए । यही कारण उनले आफ्नै डेब्यु फिल्म ‘होस्टल’को दोस्रो भाग बन्दा काम गर्न मानेका थिएनन् । निर्माताले सुशील श्रेष्ठलाई लिएर यही नाममा दोस्रो फिल्म बनाए जुन सफल पनि भयो ।

तर अनमोल आफ्नो यो घोषणामा लामो समय टिक्न भने सकेनन् । उनले ‘ए मेरो हजुर ३’ साइन गर्दै खासै चर्चामा नआएको पूर्व घोषणाबाट पछि फर्केको जनाऊ दिए । यो फिल्म बन्यो र अत्यधिक चल्यो पनि । अहिले फेरि यही ब्रान्डको चौथो फिल्म रिलिजको संघारमा छ । शुक्रबार यसको शीर्ष गीत सार्वजनिक भयो । गीत सार्वजनिक कार्यक्रममा अनमोलले किन यो फिल्मको हिस्सा बन्न स्वीकार गरे ? यसको घुमाउरो उत्तर पनि दिए । 

---

श्रीकृष्णमय बनेको गीत सार्वजनिक कार्यक्रममा अनमोलले श्रीकृष्ण श्रेष्ठले धेरै वर्ष पहिले सपनामा देखेको र बिहान उठ्दा उनको मृत्युको समाचार सुनेको प्रसंग सम्झेका थिए । ‘उहाँले मलाई सपनामा किप इट अप राम्रो गरिराछौ भन्नु भएको थियो तर बिहान उठ्दा उहाँ बितेको समाचार सुन्नु परेको थियो,’अनमोलले भने । उनले श्रीकृष्ण श्रेष्ठले स्थापित गरेको ब्रान्डलाई निरन्तरता दिन पाउँदा खुसी लागेको बताएका थिए ।

‘ए मेरो हजुर’ २० वर्षअघि सुनिलकुमार थापाले नै झरना थापा र श्रीकृष्ण श्रेष्ठको जोडीलाई लिएर बनाएका थिए । शिव रेग्मीले निर्देशन गरेको यो फिल्म उसबेला अत्यधिक सफल भएको थियो । अभिनेत्री झरना थापाले निर्देशनमा डेब्यु गर्दा यही फिल्म रोजिन् । यसको दोस्रो शृंखला हिट भएपछि उनले यही नाममा थप दुई बनाइसकेकी छिन् । उनले पनि गीत सार्वजनिक कार्यक्रममा श्रीकृष्ण श्रेष्ठकै कारणले आफूलाई अभिनयमा आत्मविश्वास पैदा भएको बताइन् ।

‘ए मेरो हजुरमा एउटा दृश्य थियो जहाँ मैले १२ टेक खानु परेको थियो । मबाट अभिनय हुन सक्दैन भन्ने लागेर म सुटिङ छाडेर भागेकी थिएँ । बाटोमा श्रीकृष्ण दाइले भेट्नु भयो’ झरनाले भनिन्, ‘ उहाँले के भयो किन भागेकी भनेर सोध्दा मैले आँशु थाम्न सकिँन । उहाँलाई आफूले काम गर्न नसकेको बताएपछि उहाँले मलाई ल यसरी गर भनेर सम्झाएर त्यही अनुसार गरेपछि त्यो सट ओके भयो । यति मात्र होइन पछि फिल्ममा त्यही संवाद हिट पनि भयो ।’

झरनाले श्रीकृष्ण श्रेष्ठसँगै यसका निर्देशक शिव रेग्मीको पनि सम्झना गरेकी थिइन् । वैशाख १ गते प्रदर्शनमा आउन लागेको फिल्ममा अनमोलसँगै सुहाना थापा, सलोन बस्नेत, निराजन प्रधान आदि कलाकारको महत्वपूर्ण भूमिका रहेको छ ।