के राजेश हमालको कमब्याक फिल्म ‘सत्यम्’ बन्छ ?

काठमाडौँ - राजेश हमालको कमब्याक फिल्म मानिएको ‘सत्यम्’ सुटिङका लागि वर्कसप भएर पनि रोकिएको छ । अघिल्लो वर्षदेखि सुटिङमा जाने भनेर हप्ता हप्ता दिनमा नयाँ अपडेट दिइरहेको फिल्म आजभोलि सुनसान छ । पोखराको नौडाँडामा फिल्मको वर्कसप नै भएका तस्बिर सार्वजनिक भए ।

कलाकार आफैँले अंग्रेजी क्याप्सनसहित वर्कसपका तस्बिर सामाजिक सञ्‍जालमा पाेष्ट गरेका थिए । तर तिहार लगत्तै फ्लोरमा जाने अपेक्षा गरेको फिल्म सुटिङमा निस्कनै सकेन । घरि मलिका महतले छाडेको त घरि पल शाहलाई नै फिल्मबाट निकालिएको चर्चा चल्यो । मलिका निस्किएको कुरा सत्य भए पनि पल शाहको अवस्था के हो ? सार्वजनिक भइसकेको छैन । तर पल शाहले त्यो फिल्म माया मारेर नै अफर आए जति फिल्म धमाधम साइन गरिरहेका छन् । 

---

यता राजेश हमाललाई पनि एउटा गतिलो फिल्मको खडेरी छ । ३ सय बढी फिल्म खेले पनि उपाधि सुहाउँदो फिल्म नहुँदा उनलाई पनि तनाव नै छ । तर हमालले मात्र के गरुन् आँटेको नभए पछि ?

उनले ‘सत्यम्’लाई आलोचकको जवाफ मानेका थिए । जिन्दगीभर सेटमा गएर खुरुखुरु संवाद बोल्ने बानी परेका हमालले यो फिल्मको स्क्रिप्टमा नै निकै समय खर्चिएका थिए । तर सुटिङको मुखमा हमाललाई नै स्क्रिप्ट चित्त नबुझेको चर्चा चल्यो । बीचमा स्क्रिप्टको काम भइरहेको बताए पनि निर्माण टिमले यसो भन्न थालेको नै ५ ६ महिना भइसक्यो । तर अझै यो फिल्म फ्लोरमा जाने सुरसार छैन ।

आइतबार एउटा म्युजिक भिडियो कार्यक्रममा ‘सत्यम्’ कहिले फ्लोरमा जान्छ भन्ने प्रश्न गर्दा हमालले यकिन उत्तर दिएनन् । फिल्म नै नबन्ने हो कि भन्ने हल्ला चलेको बेलामा उनले फिल्म बन्न चाहिँ बन्ने जवाफ दिए । 

‘अहिलेको माहोलका कारणले पनि नबनेको हो । बन्न चाहिँ अवश्य बन्छ’उनले छोटो प्रतिक्रिया दिँदै भने । यो फिल्ममा निरुता सिंह पनि खेल्ने चर्चा थियो । निरुताले पनि फिल्मलाई लिएर एक दुई मिटिंग बसे पनि पछि कुरा नभएको बताइन् । उनले राजेश हमालसँगै १२ वर्षपछि म्युजिक भिडियोमै सही काम गर्न पाएकोमा खुसी व्यक्त गरिन् ।  आइतबार सार्वजनिक भएको ‘हजुर मुसुक्क’बोलको गीतमा १२ वर्षपछि राजेश हमाल र निरुताले सँगै काम गरेका हुन् ।