‘आमा’ निर्देशक रेशराज आचार्यको निधन

काठमाडौँ - दर्जन बढी नेपाली फिल्म निर्देशन गरेका निर्देशक रेशराज आचार्यको निधन भएको छ । हृदयाघातका कारण उनको निधन भएको मुख्य सहायक निर्देशक कल्याण अधिकारीले जनाएका छन् । ६३ वर्षीय आचार्यलाई हृदयाघात भएपछि ओम अस्पतालमा लगिएको तर यहाँ लगेको आधा घन्टामा नै उनको मृत्यु भएको कल्याणले इकागजलाई बताए ।

‘मायालु’फिल्मबाट कलाकारको रुपमा नेपाली सिनेमामा प्रवेश आचार्यले ‘तिलहरी’ फिल्मबाट निर्देशन यात्रा थालेका थिए । बन्नी प्रधान र आचार्यले एक साथ ‘तिलहरी’को निर्देशन गरेका थिए । 

---

त्यसयता उनले ‘टुहुरो’, ‘आमा’, ‘बन्धन’, ‘धर्मसंकट’, ‘माटो बोल्छ’ लगायतका १५ फिल्ममा निर्देशन गरेका छन् । विराटनगर मुल घर भएका आचार्यले गोपीकृष्ण मुभिजको ब्यानरका धेरै फिल्म गरेका छन् । निर्माता निर्देशक निरक पौडेल उनका सहोदर भान्जा हुन् । उनको बिहीबार नै आर्यघाटमा अन्त्येष्टि गरिएको छ । आचार्यका एक छोरा र श्रीमती छन् ।