पल शाहले २० गतेसम्म म्युजिक भिडियो नगर्ने तर हरेक दिन आइरहेका भिडियो के गर्ने ?

काठमाडौँ - महिनामा २० दिन भिडियो खेल्ने पल शाहले ‘म यस्तो गीत गाउँछु २’ लाई समय दिने भन्दै म्युजिक भिडियो नगर्ने निर्णय गरेका छन् । उनले म्युजिक भिडियोको अफर लिएर जाने निर्माता÷निर्देशकलाई २० गतेपछि गरौँ भन्दै फर्काउने गरेका छन् ।

तर नयाँ म्युजिक भिडियोको सुटिङ नगरे पनि पहिले गरेका भिडियो नै यति धेरै छन् कि ती दिनहुँ सार्वजनिक भइरहेका छन् । पलको फेसबुकमा स्पोन्सर्ड गरिएका यस्ता भिडियोको चाङ राम्रै देख्न सकिन्छ । यसले कुन फिल्मको गीत ? कुन म्युजिक भिडियोको छुट्याउन गाह्रो भइरहेको छ ।

---

अझ पलसँगै पूजा शर्मा पनि देखिएपछि त यो अन्यौल झन् बढ्छ । तर ‘म यस्तो गीत गाउँछु २’ टिम यो कुरामा खासै चिन्तित देखिन्न । किनकि निर्मातासमेत रहेकी पूजा शर्मा आफैँ पलसँग म्युजिक भिडियो खेलिरहेकी छिन् र यस्ता भिडियो ‘म यस्तो गीत गाउँछु २’को भिडियोसँगै सार्वजनिक भइरहेका छन् । 

जस्तो कि बुधबार निर्माण टिमले थारु र नेवारी भाषामा बनेका दुई गीत देखायो जुन बुधबार र बिहीबार गरी सार्वजनिक भए । तर बिहीबार बिहानै पल शाह र पूजा शर्माको अभिनय रहेको म्युजिक भिडियो पनि सार्वजनिक भयो । ‘किन शंका गर्छौ’बोलको यो गीतमा प्रमोद खरेल र मिलन नेवारको स्वर छ भने अभिनय छ, उही पल र पूजाको । 

यति मात्र होइन म्युजिक भिडियो निर्देशकको सामाजिक सञ्जाल पछ्याउने हो भने हप्ता दिनमा पल शाहको अनुहार भएको कुनै न कुनै गीत सार्वजनिक हुन लागेको सूचना छँदैछ । 

म्युजिक भिडियोमा छिनछिनमा देखिँदा फिल्मलाई कति असर गर्छ ? त्यो त फागुन १३ गते थाहा हुन्छ । यही दिन दर्शकको वौद्धिकताको पनि जाँच हुने निश्चित छ । दर्शकले पल–पूजाका फिल्मको गीत छुट्याउँछन् कि फिल्मका गीतलाई पनि म्युजिक भिडियो ठानेर नै चुपचाप बस्छन् । यसले पल–पूजालाई मात्र होइन बाँकी कलाकार र निर्माता÷निर्देशकलाई पनि म्युजिक भिडियोको बिगबिगीले पार्ने प्रभावको चित्र कोर्न मद्दत गर्नेछन् ।