के यो साल बिहे गर्दैछन् विजय र रश्मिका ?

मुम्बई- रक्षित सेठ्ठीसँगको इंगेजमेन्ट तोडेकी रश्मिका मन्दानाको फेरि एक पटक विवाहको चर्चा सुरु भएको छ । उनले यही वर्ष बिहे गर्ने तयारी गरिरहेको भारतीय सञ्चारमाध्यममा खबर छ । 

तर उनले विवाह गर्न लागेका दुलाहा भने अरु कोही नभएर विजय देवकोरान्डा हुन् । ‘अर्जुन रेड्डी’ अभिनेता विजय र रश्मिका अफेयरमा रहेको केही समयदेखि चर्चा चल्ने गरेको छ । दुवैले अफेयरको खबर सकारेका छैनन् तर उनीहरूको हाउभाउले यो सत्यलाई नकार्ने गरेका पनि छैनन् । 

---

विजय र रश्मिका दुवैले यही साल बलिउडमा डेब्यु गर्दैछन् । यसका लागि उनीहरू दुवै जनाले मुम्बईमा फ्ल्याट पनि लिइसकेका छन् । र यसरी नै उनीहरूले यो साल विवाह पनि गर्ने तयारी गरिरहेका छन् । तर सकभर उनीहरूले यसको सुइँको दिन चाहेका छैनन् । 

विजयले मुम्बईमा नै अहिले ‘लाइगर’को सुटिङ गरिरहेका छन् भने रश्मिकाले दुई बलिउड फिल्ममा काम गरिरहेकी छिन् । रश्मिकाले सिद्धार्थ मल्होत्रासँग ‘मिसन मजनु’मा काम गरिसकेकी छिन् भने अमिताभ बच्चनसँग ‘गुडबाई’मा काम गरिरहेकी छिन् । यी दुवै फिल्मको काम सकिएसँगै दुवैले विवाह गर्ने सोच बनाएको दुवै निकट स्रोतलाई उद्धृत गर्दै लेखिएको समाचारमा भनिएको छ ।