नयनराज पाण्डेको ‘लू’माथि सिनेमा बन्‍ने

काठमाडौँ - लेखक नयनराज पाण्डेको चर्चित उपन्यास ‘लू’माथि सिनेमा बन्ने भएको छ । बुधबार कारो फिल्मस्ले उपन्यासको अधिकार खरिद गरेको जनाएको छ । बुधबार नै कम्पनीकी प्रबन्ध निर्देशक निशा खरेल र लेखक नयनराज पाण्डेबीच सम्झौता सम्पन्न भएको छ । 

क्लास्सिक टेकको भगिनी संस्था कारो फिल्म्सले ‘लू’सँगै फिल्म निर्माणमा हात हाल्न लागेको हो । चलचित्र ‘लू’ को पटकथा पनि लेखक नयन राज पाण्डेले नै लेख्ने छन् । ‘लू’सँगै सँगै कारो फिल्म्सले नेपालमा उच्च गुणस्तर एवं बिग बजेट चलचित्र निर्माण गर्ने जनाएको छ ।

---

कम्पनीले अत्याधुनिक प्रविधिका निर्माण सामाग्री पनि भित्र्याउने प्रक्रिया अन्तिम चरणमा रहेको जनाएको छ ।  आगामी दिनमा कारो फिल्म्सले वेब सिरिज तथा रियालिटी सोहरु निर्माण गर्ने बताएको छ । ‘आउने दिनमा नेपालको फिल्म क्षेत्रमा उत्कृष्ट प्रविधि भित्र्याउने र ठूला बजेटका चलचित्र बनाएर नेपाली चलचित्र क्षेत्रलाई नयाँ उचाइमा लाने कारो फिल्मस्को उद्देश्य छ । ‘लू’सँगै हामीले यसको सुरुवात गर्न लागेका हौँ,’ निशाको भनाइ छ । 

नयनराज पाण्डे लिखित अघिल्ला दुई उपन्यासमा पनि फिल्म बन्ने चर्चा थियो । उनी लिखित ‘उलार’ र ‘सल्लिपिर’मा पनि फिल्म बनाउने भन्दै निर्माताले अधिकार खरिद गरेका थिए । तर अहिलेसम्म दुवै फिल्मको काम अगाडि बढ्न सकेको छैन ।