अनमोलको ‘कोको’ छाएको ‘ए मेरो हजुर ४’ ट्रेलर

काठमाडौँ - अलि ठूलै सेलिब्रेटी भइसकेपछि सिर्जना मात्र होइन, सेलिब्रेटीको व्यक्तिगत जीवन पनि आम मानिसको चासोमा रहन्छ । अनमोल केसी नेपालमा यही कोटीका सेलिब्रेटी मानिन्छन् । त्यसैले उनका फिल्ममा मात्र होइन अरु कुरामा पनि जनताको चासो रहन्छ ।

यही चासोले अनमोलले ‘कोको’नामको कुकुर पालेको र उनको यो कुकुरले अनमोलसँगै ‘ए मेरो हजुर ४’मा अभिनय गरेको खबर बाहिरिएका थिए । नभन्दै बिहीबार सार्वजनिक ट्रेलरमा फिल्ममा रहने अरु कलाकारले भन्दा ‘कोको’ले स्क्रिन स्पेस ज्यादा पाएको छ । निर्देशक झरना थापाले नयाँ कलाकारलाई प्रवेश गराएझैँ ‘कोको’लाई बेग्लै प्लेट दिँदै ‘इन्ट्रोड्युस’ गराएकी छिन् । 

---

४ मिनेट लामो ट्रेलरलाई प्रेमिल बनाउने प्रयास गरिएको छ । तर ट्रेलर सार्वजनिक कार्यक्रममा कलाकार तथा निर्देशकको ध्यान फिल्मको बाँकी कथा बताउनभन्दा पनि विदेशी फिल्मसँग कसरी भिड्ने भन्ने चिन्तामा केन्द्रित रह्यो । ट्रेलर सार्वजनिक कार्यक्रममा बोल्दै निर्माता सुनिलकुमार थापाले फिल्मलाई नेपाल–भारतबीचको फुटबल म्याचसँग तुलना गरे । 

‘जसरी नेपाल भारतको खेलमा दर्शकले नेपाललाई सपोर्ट गर्ने गर्नुभएको छ यही अपेक्षा हामीले फिल्ममा पनि राखेका छौँ,’ उनले भने, ‘उनीहरूले एउटा गोल गरे भने हामी दुइटा गोल गर्न तयार छौँ ।’ निर्माता थापाले ९ सय करोडको फिल्मसँग आफ्नो ३ करोडको फिल्म भिड्न तयार रहेको बताउँदै फिल्मले मनोरञ्जन ग्यारेन्टी गर्ने दाबी गरे । 

निर्देशक झरना थापाले पनि अघिल्ला शृंखलामा पाएको स्नेहका लागि धन्यवाद दिँदै थप बलियो फिल्म बनाएको दाबी गरिन् । कार्यक्रममा अनमोल र सुहाना थापाले पनि फिल्म र दर्शकप्रति आफूलाई भरोसा भएको भन्दै फिल्मले मनोरञ्जनको ग्यारेन्टी गर्ने दाबी गरेका थिए । ‘ए मेरो हजुर ४’ वैशाख १ गते प्रदर्शन हुँदैछ । यही मितिमा कन्नड फिल्म ‘केजिएफ’को दोस्रो भाग र बलिउड फिल्म ‘जर्सी’ पनि रिलिज हुँदैछन् ।