सिरियलको झल्को दिने ‘लक्का जवान’ ट्रेलर सार्वजनिक

काठमाडौँ - महामारीका कारण रोकिएको फिल्म ‘लक्का जवान’को ट्रेलर सार्वजनिक भएको छ । निर्माण टिमले कुनै औपचारिक कार्यक्रम नगरी युट्युबमा ट्रेलर सार्वजनिक गरेको छ । सार्वजनिक ट्रेलरले सिरियलको झल्को दिन्छ । 

शिवहरि पौडेलको लेखन तथा निर्देशन रहेको फिल्ममा कलाकारको जम्बो टोली रहेको छ । फिल्ममा शिवहरि बाहेक मदनकृष्ण श्रेष्ठ, जयनन्द लामा, किरण केसी, राजाराम पौडेल, सुशील पोखरेल, सरोज खनाल, दीलिप रायमाझी, सविन श्रेष्ठ, प्रियंका कार्की, सलोन बस्नेत, वर्षा सिवाकोटी आदि कलाकारको अभिनय रहेको छ । 

---

हास्य श्रेणीको फिल्मलाई पुरुषोत्तम प्रधानले खिचेका हुन् भने फिल्ममा संगीत बाबुल गिरीको रहेको छ । फिल्मलाई ध्रुव वन्तसँगै दीलिप रायमाझी, किरण केसी र शिवहरि पौडेल मिलेर बनाएका हुन् ।पहिला नै दुई गीत सार्वजनिक गरिसकेको फिल्म वैशाख २३ गतेदेखि सार्वजनिक प्रदर्शनमा आउँदैछ ।