दुर्गेशलाई दशा, ‘ए मेरो हजुर ४’ बाट झिकियो गीत तथा दृश्य

काठमाडौँ  - पल शाह प्रकरणमा पल शाहको फ्यानको निशानामा परेका दुर्गेश थापाले प्रदर्शनको संघारमा रहेको ‘ए मेरो हजुर ४’मा पाएको स्क्रिन स्पेस पनि गुमाएका छन् । निर्माण टिमले सम्भावित विवादलाई मध्येनजर गर्दै दुर्गेश थापाको गीत तथा दृश्य फिल्मबाट हटाएको इकागजले जानकारी पाएको छ ।

स्रोतका अनुसार फिल्ममा दुर्गेश थापाले ¥यापरको भूमिका निर्वाह गरेका थिए । फिल्मको सुरुवातका केही दृश्यमा दुर्गेशको उपस्थिति थियो तर पल शाह प्रकरणमा पल शाहका फ्यान उनीविरुद्ध रहेको देखेपछि फिल्मलाई असर नगरोस् भनेर निर्माण टिमले उनी देखिएका गीत तथा दृश्य सम्पादन गर्ने निर्णय गरेको हो ।

---

र्यापर जी–बबसँग अभिनेता अनमाेल केसी 

निर्माण टिमले हालसालै मात्र उनको ठाउँमा निर्माण टिमले जी–बब नामले चिनिने ¥यापर सुदीप भण्डारीको स्वर राख्ने निर्णयसहित गीत रेकर्ड गराइसकेको छ । आजभोलि नै सार्वजनिक हुन लागेको गीतको शब्द, संगीत तथा स्वर जी–बबकै रहेको छ । उनको स्वर रहेको ‘मिलेन लेभल तेरो बाऊ बोला’ पपुलर कल्चरमा सामेल भइसकेको छ । 

निर्माण टिमले सुटिङको बीचमा दुर्गेश थापालाई भित्र्याएको जानकारीसँग फोटो सार्वजनिक गरेको थियो । तर ताजा विवादका कारण उनलाई हटाउन निर्णय गरेको हो । 

पल शाह प्रकरणमा षडयन्त्रकारीको भिल्ला भिराइसँगै दुर्गेशले केही महोत्सव गुमाइसकेका छन् ।  ‘ए मेरो हजुर ४’ यो प्रकरणको पछिल्लो प्रकरण हो । दुर्गेशलाई यसअघि दीपक राज गिरीको समूहले पनि ‘छ माया छपक्कै’ रिलिजको समयमा दुर्गेशकै ‘बीच्च बीच्च’ बोलको गीतमा नचाएको थियो ।