ओटिटीमा डेब्यू गर्दै जेम्स बन्ड, पहिलोदेखि पछिल्लोसम्म प्राइममा आउँदै

लसएन्जल्स - आजसम्म हलबाहेक कतै पनि सार्वजनिक नभएका जेम्स बन्ड सिरिजका फिल्म पहिलो पल्ट ओटिटीमा सार्वजनिक हुने भएका छन् । जेम्स बन्ड सिरिज निर्माता एमजीएमले अमेजन भिडियोसँग गरेको सम्झौताका आधारमा ती फिल्म प्लेटफर्ममा उपलब्ध हुन लागेका हुन् ।

एमजीएमले आफूले निर्माण तथा वितरण गरेका ४ हजार बढी फिल्म र १७ हजार बढी टीभी सिरियल अमेजनको प्राइम भिडियोलाई उपलब्ध गराएको हो । सम्झौताअनुसार बन्डको पहिलो फिल्मदेखि हालै रिलिज भएको ‘नो टाइम टु डाई’सम्म प्राइममा पाइनेछन् । प्राइमका उप निर्देशक माइक हप्किन्सले यही अप्रिलको १५ देखि दर्शकले जेम्स बन्ड सिरिजका फिल्म हेर्न सकिने जानकारी गराएका छन् । 

---

तथापि प्राइमले जेम्स बन्ड फिल्म सीमित समयका लागि हेर्न पाइने जानकारी गराएको छ । तर कहिलेदेखि कहिलेसम्म भन्ने चाहिँ खुलाएको छैन । माइकले एमजीएमको सय वर्ष पुरानो कथा वाचनको इतिहास दुनियाँका दर्शकलाई उपलब्ध गराउने सोचसहित फिल्म तथा सिरिज ओटिटीमा राख्ने निर्णय गरेको बताएका छन् । बन्ड सिरिजको २५ औँ फिल्म ‘नो टाइम टु डाई’ ८ अक्टोबरमा विश्वभर रिलिज भएको थियो ।