फिल्म ‘मायाको माया’आनासँग अनुपको जोडी

काठमाडौँ - भर्खरै ‘लाखे’को सुटिङ सकाएका अनुपविक्रम शाहीले ‘मायाको माया’ शीर्षकको फिल्म गर्ने भएका छन् । रोहित करण वैद्यको निर्देशन रहने फिल्मको केही दिनअघि कार्यविनायकमा मुहूर्त गरिएको थियो । अनुपविक्रम इन्स्टा स्टोरीमा पूजा गरेको फोटो राख्दै ‘मायाको माया’मा काम गर्न लागेको जानकारी गराएका थिए । 
यो फिल्ममा अनुपले आना शर्मासँग जोडी बाँध्नेछन् । अनुपले फिल्म गर्न लागेको जानकारी गराए पनि विस्तृत जानकारी आफूसँग पनि नभएको बताए । 
‘मैले सम्झौता गरेको हो बाँकी धेरै कुरा चाहिँ मलाई पनि जानकारी छैन ।

निर्माण टिमले उचित समयमा जानकारी गराउलानी,’अनुपले इकागजसँग भने । तीन वर्षअघि रिलिज भएको ‘दि मेन फ्रम काठमाडौँ’पछि आना फिल्मविहीन छिन् । बीचमा साम्राज्ञीराज्य लक्ष्मी शाह र मनिष राउतसँगको एउटा फिल्म घोषणा भए पनि त्यो फिल्म बन्ने सुरसार देखिएको छैन ।

---

मनिष ‘शमशेर’ नामको अर्कै फिल्म गरिरहेका छन् भने साम्राज्ञीले ‘लन्डन टु पेरिस’देखि मिलन चाम्सको ‘वर एन्ड वधु’मा केमियो गरिरहेकी छिन् । आनाको चर्चा पछिल्लो समय प्रेमका कारण हुने गरेको छ । आना गायक सुशान्त केसीसँग बाक्लै देखिन् थालेकी छिन् दुवैले सँगै अंग्रेजी नयाँ वर्षसँगै एडभेन्चर डेट पनि हानिरहेका छन् ।