हलमा कमेडियनको 'लक्का जवान' र थ्रिलर 'षट्कोण'

काठमाडौँ - बक्स अफिसमा दर्शक जुटाउन संघर्ष गरिरहेका नेपाली फिल्मले भरोसा छाडी सकेका छैनन् । हरेक हप्ता कुनै न कुनै नेपाली फिल्म रिलिज भइरहेकै छन् ।  आज भने हलमा एक साथ दुई नेपाली सिनेमा रिलिज हुँदैछन् । यसमा कमेडियनको जम्बो टोली रहेको 'लक्का जवान' र 'षटकोण' रहेका छन् । 

शिवहरि पौडेलको लेखन तथा निर्देशन रहेको 'लक्का जवान'मा सानो पर्दाका अधिकांश नाम चलेका कलाकारको अभिनय रहेको छ । शिवहरि पौडेलले फिल्ममा ४० जना हाराहारी कमेडियनको भूमिका रहेको बताउँदै फिल्मले रमाइलो ग्यारेन्टी गराउने दाबी गरेका छन् ।

---

यो फिल्ममा शिवहरि पौडेलसँगै किरण केसी, दीलिप रायमाझी, राजाराम पौडेल, सलोन बस्नेत, प्रियंका कार्की, वर्षा सिवाकोटी आदि कलाकारको अभिनय रहेका रहेको छ । महामारीका कारण प्रदर्शन रोकिएको फिल्मका गीतले औसत सफलता पाएका छन् । 

यसैगरि कार्मको मुख्य भूमिका रहेको षट्कोण थ्रिलर विधाको फिल्म हो । फिल्ममा कार्मले रहस्य पत्ता लगाउने कोशिसमा रहेको पत्रकारको भूमिका निर्वाह गरेका छन् । यो फिल्मलाई मिलन काप्रीले निर्देशन गरेका छन् । 'कठ्पुतली'पछि कार्मको यो साल दोस्रो रिलिज हो । उनले थ्रिलर रुचाउने दर्शकका लागि 'षट्कोण' उपयुक्त सिनेमा भएको बताउँदै आएका छन् ।