रनवीर–आलियाको ‘ब्रम्हास्त्र’ हलिउडको डिज्‍नेले वितरण गर्ने

मुम्बई :  रनवीर कपुर र आलिया भट्टको मुख्य भूमिका रहेको ‘ब्रम्हास्त्र’लाई विश्वभर डिज्नेले वितरण गर्ने भएको छ । फिल्म संसारभर सेप्टेम्बर ९ मा प्रदर्शन हुँदैछ । 
कुनै पनि हिन्दी फिल्म दि वाल्ट डिज्नेले वितरणको जिम्मा लिएको पहिलो अवसर हो । दुई भागमा बनेको यो फिल्मको पहिलो भाग ‘ब्रम्हास्त्र भाग १ः शिवा’ डिज्नेले वितरण गर्न लागेको हो । 

फक्स स्टार स्टुडियोले निर्माण गरेको यो फिल्ममा अमिताभ बच्चन र नागार्जुन पनि महत्वपूर्ण भूमिकामा रहेका छन् । पौराणिक मिथमा आधारित फिल्ममा भिज्यवुल इफेक्टस्को राम्रो प्रयोग भएको चर्चा छ । निर्माण टिमले केही दिनमै यसको ‘केसरिया’बोलको गीत सार्वजनिक गर्दैछ । योसँगै फिल्म भारतमा ५ भाषामा एक साथ रिलिज हुँदैछ । हिन्दीबाहेक यो फिल्म तमिल, तेलगु, मलयालम र कन्नड भाषामा पनि रिलिज हुने चर्चा छ । 

---

डिज्नेले ‘ब्रम्हास्त्र’सँगै ‘थोर लभ एन्ड थन्डर’, ‘ब्ल्याक प्यान्थर’, ‘अवतार’आदि फिल्म रिलिज गर्दैछ । भर्खरै विवाह गरेका रनवीर र आलियाको सहकार्य रहेको यो पहिलो फिल्म हो । यही फिल्मको सुटिङको दौरान दुवै नजिकिएका थिए ।