‘सत्यम्’ अनिश्चित भएपछि राजेश हमालले साइन गरे अर्को फिल्म

काठमाडौंँ  - राजेश हमालको कमब्याक फिल्म मानिएको ‘सत्यम्’ बन्ने÷नबन्ने टुंगो नभएपछि राजेश हमालले यो फिल्म छाडेर अर्को फिल्म साइन गरेका छन् । हमालले चुनाव लगत्तै सुटिङ जाने गरी यो फिल्ममा काम गर्ने भएका हुन् ।

निर्माण टिम र राजेश हमालबीच फिल्म गर्ने सम्बन्धमा कागजी सम्झौता भइसकेको र हमालले फिल्ममा राम्रै रकम लिएको हमाल निकट स्रोतले इकागजलाई जानकारी गराएको छ । 

---

स्रोतका अनुसार ३० दिनको सुटिङ सेड्युल भएको फिल्मलाई लन्डन रिटर्न निर्देशकले निर्देशन गर्न लागेका हुन् । लन्डनमा फिल्म मेकिङ पढेका युवाले निर्देशन गर्ने फिल्म राजेश हमालले गरिआएको भन्दा भिन्न रहने जनाइएको छ । 

‘मास फिल्म भन्दा पनि क्लासको फिल्म हो । आफूसँग भएका १५ बढी स्क्रिप्टबाट उहाँले यो छान्नु भएको हो,’ हमाल निकट स्रोतले भन्यो । राजेश हमालको शीर्ष भूमिका रहेका फिल्मले बक्स अफिसमा खराब प्रर्दशन गरेपछि राजेश हमालले फिचर फिल्मबाट ब्रेक लिएका थिए । उनले अभिनय गरेका ‘शकुन्तला’ तथा ‘बागमती’ बक्स अफिसमा असाध्यै कमजोर मानिएका थिए । 

यसैबीच हमाल निकट स्रोतले ‘सत्यम्’को पनि सुटिङको तयारी भइरहेको जनाएको छ । स्रोतले कास्ट एन्ड क्रुमा केही हेरफेरसहित फिल्मको सुटिङ हुने जानकारी गरायो निर्माण टिमले सुटिङ अगाडि नै यसको शीर्ष गीत सार्वजनिक गर्ने तयारी गरिरहेको छ ।