सौगात–दयाको रोजाइ : रिलिजका फिल्मको प्रचार छोडी सुटिङ

काठमाडौँ - ‘कबड्डी ४’ रिलिजका अब धेरै समय छैन । चुनाव र मत परिणामप्रति जनताको चासोको समय कटाउने हो भने यो फिल्मको प्रचार गर्ने समय एक हप्ता पनि छैन । तर यो फिल्मका मुख्य कलाकार दयाहाङ राई र सौगात मल्ल त्यही एक हप्ताका लागि निर्माण टिमसँग हुन्छन् कि हुन्नन् टुंगो छैन । 

नेपालमा फिल्म बनाउन भन्दा पनि चलाउन चुनौतीपूर्ण हुँदै गएको छ । शुक्रबार रिलिज भएका फिल्म आइतबारदेखि नै हलबाट उत्रन थालेका छन् । तर फिल्मका कलाकार भने थाहै नभए जस्तो गरी एक पछि अर्को फिल्म साइन गर्दै बसेका छन् । 

---

जस्तो कि ‘मन्त्र’ रिलिजको समयमा सौगात मल्ल ‘२ नम्बरी’को सुटिङमा हिँडिदिए । निर्माण टिमले बल्ल बल्ल प्रिमियरका लागि पोखराबाट उनलाई झिकायो । भोलिपल्टै सौगात पोखरा फर्किए । 

यही अवस्था दयाहाङको पनि छ । ‘गाउँ आएको बाटो’को सुटिङका कारण ‘२ नम्बरी’ भनेको बेलामा सुटिङमा जान पाएन । अब ‘२ नम्बरी’को सुटिङ भइरहँदा ‘कबड्डी ४’को प्रचार ठप्प छ । दयाहाङले फेसबुकमा विदेशतिर हुने सोको प्रचार गरिरहेका छन् तर विदेशको प्रदर्शन नेपालको बक्स अफिसमा निर्भर रहने गरेको छ । नेपालमा राम्रो चल्यो, विदेशतिर पनि सो चल्यो हैन भने चलेन । तर दयाहाङ र सौगात दुवैलाई यो फिल्म प्रचार गर्ने फुर्सद छैन । 

‘२ नम्बरी’को सुटिङ केही दिनमा सकिँदैछ तर दयालाई ‘के घर के डेरा’को टिम पर्खेर बसिरहेको छ । यो फिल्म जेठ २ गतेबाट फ्लोरमा जाँदैछ अर्थात् दया काठमाडौँ आएर पनि ‘कबड्डी ४’ को प्रचारमा लाग्न समय पाउनेछैनन किनकि ‘के घर के डेरा’को टिम उनलाई पर्खेर बसेको छ । यता सौगातको पनि त्यही अवस्था छ । 

हलमा लागेका फिल्म दुई दिनमै उत्रिरहेको समयमा टिकाउन मद्दत गर्नु कलाकारको पहिलो कर्तव्य हो । तर कलाकार भने पैसा लिएर एक पछि अर्को फिल्ममा कुद्नमा रमाइलो मानिरहेका छन् ।