गोर्खा आर्मीलाई खुकुरी रमको भव्य सम्मान

पोखरा - खुकुरी रमको उत्पादक कम्पनी दि नेपाल डिस्टीलरिजले १२० जनाभन्दा बढी पूर्व गोर्खा सैनिकहरूलाई सम्मान गरेको छ । पोखरामा बिहीबार साँझ एक भव्य समारोहको आयोजना गरी नेपाली र वीरताको पर्यायको रुपमा स्थापित सेवानिवृत गोर्खा सैनिकहरूलाई सम्मान गरेको हो ।

भारतीय सेना, ब्रिटिस सेना, सिंगापुर आर्मी लगायतमा काम गरी सेवानिवृतहरूको कार्यक्रममा सहभागिता रहेको थियो ।  

---

सो क्रममा कम्पनीले वीरता प्रदर्शन गरी भारतमा विभिन्न पदक पाएका भारतीय सेनाका निवृत्त सैनिक विष्णुप्रसाद श्रेष्ठ र क्वीन एलिजावेथ लगायतका प्रतिष्ठित मेडलबाट सम्मानित ब्रिटिस आर्मीको मेजर पदबाट सेवानिवृत दिलबहादुर गुरुंगलाई विशेष सम्मान गरेको थियो । 

कम्पनीको तर्फबाट मानव संसाधन प्रमुख जनकराज रेग्मीले श्रेष्ठ र गुरुंगलाई विशेष प्रकारले सुसज्जित खुकुरी उपहार दिई सम्मान गरेका थिए । यस्तै, कार्यक्रममा सहभागी १२० भन्दा बढी पूर्व गोरखा सैनिक र उहाँहरूका पत्नीहरूलाई समेत कम्पनीले ‘मायाको चिनो’ ले सम्मान गरेको थियो । 

कार्यक्रममा गोर्खा सैनिकहरूले नेपाल र नेपालीको नाम विश्वमा चम्काएका विषयमा वक्ताहरूले चर्चा गरेका थिए । गोर्खा सैनिकको वीरता र त्यसको प्रतिकको रुपमा रहेको खुकुरी र सोही नामबाट सर्वश्रेष्ठ रम उत्पादन गर्दै आएको कम्पनीले संस्थागत सामाजिक उत्तरदायित्वअन्तर्गत आयोजना गरेको कार्यक्रम महत्वपूर्ण रहेको उनीहरूले बताए । 

कार्यक्रममा कम्पनीले आगामी वर्ष लडाईंको मैदानमा वीरता प्राप्त गर्ने गोर्खा सैनिकका २ जना बालबच्चालाई उच्च शिक्षासम्मका लागि पूर्ण छात्रवृतिको समेत घोषणा गरेको थियो । 

कार्यक्रममा प्रमुख अतिथिको रुपमा रहेको गण्डकी प्रदेशका नेपाली सेनाका उपरथि दीपककुमार बानियाँले खुकुरी रमले थालेको नौलो र महत्वपूर्ण प्रयासका लागि धन्यवाद दिएका थिए । 

उनले आफूले समेत विदेशका साथी तथा आफन्तलाई नेपालको उपहारको रुपमा खुकुरीको कोरोनेसन ब्राण्ड लैजाने गरेको उदाहरण दिंदै गोर्खा सैनिकहरूप्रति कम्पनीले देखाएको सदाशयताको प्रशंसा गरेका थिए । 

सो क्रममा उनले आफूहरू पूर्व सैनिकहरूसँग सहकार्य गर्न तयार रहेको समेत बताएका थिए । गोर्खा समाज पोखराका अध्यक्ष लक्ष्मीबहादुर गुरुंगले देशले आफूहरूलाई बिर्सिएको भन्दै नेपाल डिस्टीलरिजले चाहिँ सम्झिएर सम्मान गरेकोमा धन्यवाद ज्ञापन गरेका थिए । 

उनले कम्पनीसँग सहकार्यको सुरुवात भएको र भविष्यमा यो अझै घनिभूत हुने विश्वास व्यक्त गरेका थिए । सम्मानपछि कम्पनीले पूर्व गोर्खा सैनिक र उहाँहरूका परिवारका लागि रात्रिभोजको समेत आयोजना गरेको थियो ।