नारी टेलिभिजन एचडीद्वारा महिलाहरूका लागि वित्तीय साक्षरता तालिम

काठमाडौँ- नारी टेलिभिजन एचडीले महिलाहरूका लागि एक दिने वित्तीय साक्षरतासम्बन्धी कार्यक्रम गरेको छ । नारीहरूका मुद्दाहरूलाई प्राथमिकतामा राख्दै आइरहेको नारी टेलिभिजनले बैंकिङ क्षेत्रमा समेत महिलाहरूको क्षमता अभिवृद्धि गर्ने उद्देश्यले कार्यक्रम गरिएको बताएको छ ।

निकिता पौडेल लामिछानेको अध्यक्षतामा भएको कार्यक्रममा विशिष्ट अतिथिका रूपमा २०१९ कि मिस नेपाल अनुष्का श्रेष्ठ, सञ्चारकर्मी सरिताश्री ज्ञवालीलगायतको उपस्थिति रहेको थियो ।

---

नारी टेलिभिजनको आयोजना, हिमालय सोसल जर्नि र नबिल बैंकको सहकार्यमा बिहीबार काठमाडौँको लैनचौरस्थित लैनचौर बैङ्क्युटमा महिलाहरूलाई वित्तीय साक्षरता सम्बन्धी तालिम दिइएको हो ।

कार्यक्रममा हिमालय सोसल जर्निका सस्थापक अध्यक्ष राम सापकोटाले हिमालय सोसल जर्निले दिँदै आएको सेवा सुविधाको बारेमा समेत जानकारी गराएका थिए । 

कार्यक्रममा नबिल बैंकका प्रमुख बजार व्यवस्थापक कृष्ण सुवेदी, सहायक सम्पर्क व्यवस्थापक, व्यवस्थापक सानो कर्जा संयोजक नविल विद्यालय व्यवस्थापक लगायतका व्यक्तिहरूले बैंकिङ कारोबार तथा वित्तीय साक्षरता सम्बन्धी प्रशिक्षण दिइएका थिए ।

तालिममा बैंकिङ कारोबार कसरी गर्ने, बैंकिङ कारोबार गर्दा ध्यान दिनुपर्ने कुरा र बैंकिङ कारोबार गर्दा नागरिकहरूले भोग्नुपरेको समस्या र समाधानका विषयमा सम्पूर्ण जानकारी गराइएको थियो ।

तालिममा काठमाडौँ उपत्यकाका विभिन्न ठाउँबाट १ सय १५ जना महिलाहरूको सहभागिता रहेको थियो । 

बैंकिङ कारोबारको विषयमा त्यति जानकारी नहुँदा विभिन्न ठगीका घटनाहरू भइरहेको समयमा नारी टेलिभिजनले आयोजना गरेको कार्यक्रमले धेरै कुरा सिक्ने अवसर दिइएको भन्दै कार्यक्रमका सहभागीहरूले खुसी व्यक्त गरेका थिए ।