भारतबाट बाँके फर्किएका नौ जनामा कोभिड संक्रमण

बाँके :  बाँकेमा भारतबाट आएका नौ जनामा कोरोना भाइरस संक्रमण पुष्टि भएको छ । बाँकेको नेपालगञ्=hस्थित जमुनाह नाका हुँदै भारतबाट आज नेपाल प्रवेश गरेका १४ जनालाई भाइरस संक्रमणको आशङ्कामा नमूना परीक्षण गर्दा पुष्टि भएको हो । 

बाँकेमा आज भारतबाट नेपाल फर्किने कूल नेपालीमध्ये ६४ दशमलव २८ प्रतिशतमा कोरोना भाइरस संक्रमण पुष्टि भएको नेपालगञ्ज उपमहानगरपालिका स्वास्थ्य शाखाका प्रमुख रामबहादुर चन्दले जानकारी दिए । उनका अनुसार नेपालगञ्जस्थित जमुनाह नाकामा सञ्‍चालन गरिएको स्वास्थ्य सहायता कक्षमा गरिएको नमूना परीक्षणमा भारतको गुजरात र दिल्लीबाट आएकामा भाइरस संक्रमण पुष्टि भएको हो ।

---

भारतको गुजरातबाट आएका सात र दिल्लीबाट आएका दुई जनामा संक्रमण पुष्टि भएको छ । पुष्टि हुनेमा सुर्खेतका छ तथा बाँके, दाङ र जाजरकोटका एक-एक जना रहेको प्रमुख चन्दले जानकारी दिए ।  

भारतमा संक्रमण बढेसँगै नेपाल फर्किएकाबाट नेपालमा पनि संक्रमण तीव्रगतिमा फैलिनेतर्फ मध्यनजर गर्दै नेपालगञ्ज उपमहानगरपालिका स्वास्थ्य शाखाले गत चैत ११ गतेदेखि जमुनाह नाकामा स्वास्थ्य कक्ष स्थापना गरी नेपाल आउनेहरूको ज्वरो नाप्‍ने तथा शङ्कास्पद देखिएमा एन्टिजेन प्रविधिमार्फत कोरोनाको जाँच गर्दै आएको छ ।

भारतमा अहिले तीव्ररूपमा संक्रमण बढेकाले रुपैडिहामा किनमेलका लागि जानमा रोक लगाइनुका साथै भारतका विभिन्न शहरबाट घर फर्किने नेपालीलाई समेत नेपाल–भारत सीमाक्षेत्र जमुनाहमा अनिवार्य कोरोना परीक्षण गर्न लगाइएको प्रमुख जिल्ला अधिकारी शिवराम गेलालले जानकारी दिए । 

उनका अनुसार सीमानाकामा कडाइसँगै अत्यावश्यक कामबाहेक भारत जान रोक लगाउने, भारतबाट आएका व्यक्तिलाई स्वास्थ्य परीक्षणका लागि नाकामा जनशक्ति थप गर्ने, नेपालगञ्ज बजार क्षेत्रमा समेत मास्कको अनिवार्य प्रयोग र सामाजिक दूरी कायम गर्न जिल्ला सङ्कट व्यवस्थापन केन्द्र बाँकेको बैठकले आग्रह गरेको छ ।

बाँकेमा कोरोना संक्रमण दर अस्वभाविकरूपमा बढ्दै  गएको बताइएको छ । स्वास्थ्यका मापदण्ड कार्यान्वयनमा बेवास्ताका गरिएमा विगतमा जस्तै फेरि बाँके कोरोना संक्रमणको केन्द्रविन्दु बन्ने आशंका बढेको छ । 

बाँकेमा आज मात्रै १०६ मा  संक्रमण पुष्टि भएको बाँकेका कोरोना स्रोत व्यक्ति तेज वलीले जानकारी दिए । उनका अनुसार भेरी अस्पताल नेपालगञ्‍जको प्रयोगशालामा १९० जनाको स्वाब परीक्षण गर्दा १०६ मा कोरोना भाइरस संक्रमण पुष्टि भएको हो । (रासस)