कोभिड संक्रमितले जन्माइन् स्वस्थ बच्चा (फोटोफिचर)

काठमाडौँ : बाँकेको भेरी अस्पतालमा कोभिड संक्रमित गर्भवतीले स्वस्थ बच्चा जन्माएकी छन् । अस्पतालमा भर्ना भएकी २६ वर्षीय संक्रमित महिलाले स्वस्थ बच्चा जन्माएकी अस्पतालका मेसु डा. प्रकाश थापाले जानकारी दिए । उनका अनुसार बर्दिया बढैया १ की महिला बिहिबार साढे ८ बजे भर्ना भएकी थिइन् । आमा र बच्चा दुवैको स्वास्थ्य अवस्था सामान्य रहेको उनले बताए ।

'चिकित्सकले आवश्यक जनस्वास्थ्यको मापदण्ड अपनाएर शल्यक्रिया गरेका थिए,' डा.थापाले भने,' अस्पतालका डा. नबिन बुढाथोकीको टीमले उक्त शल्यक्रिया गरेको हो ।'

---

कोभिड संक्रमितको संख्या बढन थालेपछि वर्गीकरण गरिएका सबै अस्पतालमा भर्ना लिन थालिएको थापाले जानकारी दिए । यसअघि संक्रमितको उपचार गर्न प्रदेश तथा जिल्लामा लेभल अनुसारका अस्पतालको निर्माण गरिएको थियो । लेभल १,लेभल २ र लेभल ३ थियो । लेभल ३ गम्भीर प्रकृतिका गम्भीर शल्यक्रिया गर्नुपर्ने बिरामीलाई भर्ना लिने गरिएको थियो ।

शल्यक्रिया गर्नुपर्ने खालका संक्रमितलाई समेत भर्ना लिन थालिएको थापाले बताए । बच्चालाई कोभिड नभएको उनले जानकारी दिए । आमाको गर्भबाट कोभिड सर्दैन र श्वासप्रश्वासको माध्यमबाट सर्ने भएकोले बच्चामा कोभिड छैन,' उनले भने । आमालाई पूर्ण सावधानीका साथ राखिएको उनले जानकारी दिए ।

तस्बिरहरू ः डा. प्रकाश थापाको फेसबुकबाट