सुन्दरहरैँचाले सुरु गर्‍यो घरमै निःशुल्क औषधिसहितको प्राथमिक उपचार सेवा

विराटनगर : कोभिड-१९ महामारीको दोस्रो चरणवाट नागरिकहरूलाई सुरक्षित राख्‍न मोरङको सुन्दरहरैँचा नगरपालिकाले बिरामीहरूलाई घरमा नै औषधिसहितको प्राथमिक उपचारका लागि स्वास्थ्य टोली खटाएको छ । नगरपालिकाले बिरामीहरूलाई निःशुल्क एम्बुलेन्स सेवा पनि उपलब्ध गराएको जनाएको छ ।
 
नगरका १२ वटै वडाहरूमा स्वास्थ्यकर्मी खटाइ कोरोना संक्रमण भइ होम आइसोलेसनमा बसेका विरामीहरूलाई अत्यावश्यक औषधि निशुल्क वितरण र प्राथमिक उपचार गरिरहेको नगर प्रमुख शिवप्रासद ढकालले जानकारी दिए । नगरबासीलाई अस्पतालसम्म पुर्‍याउन २४ घण्टा दुई एम्बुलेन्स तयारी अवस्थामा राखिएको प्रमुख ढकालले बताए । 

एम्बुलेन्सले विरामीहरूलाई निःशुल्क अस्पताल पुर्‍याउने ढकालको भनाइ छ । नगर क्षेत्रमा रहेको पूर्वाञ्चल विश्वाविद्यालयलाई कोभिड-१९ का बिरामीहरूको उपचारका लागि ५० वेड आइसोलेशन तत्काल सञ्चालनमा ल्याउन नगरले आवश्यक सहयोग गर्ने भएको छ । 

---

यसै गरी सुन्दरहरैंचा उद्योग वाणिज्य संघ र सुन्दरदुलारी उद्योग बाणिज्य संघसँगको सहकार्यमा १ सय ५० थान अक्सिजनका सिलिण्डरको व्यवस्थापन गरिने नगरपालिकाले जनाएको छ । प्लाज्मा थेरापी र अन्य बिरामीहरूका लागि रगत संकलन गर्न गछिया जेसिस र इन्द्रपुर जेसिससँग समन्वय गरी रक्तदान कार्यक्रम सञ्चालन गर्ने तयारी भएको प्रमुख ढकालले वताए ।