जनकपुरधाममा थप तीन संक्रमितको मृत्यु

जनकपुरधाम : प्रादेशिक कोभिड विशेष अस्पताल जनकपुरधाममा तीन जना कोभिड संक्रमितको मृत्यु भएको छ । अस्पतालका मेडिकल सुपरिटेन्डेन्ट डा. प्रमोद यादवका अनुसार मृत्यु हुनेमा एक महिला र दुई पुरुष रहेका छन् ।

जनकपुरधाम-२३ लादोबेलाकी ४२ वर्षीया एक महिला, जनकपुरधामकै ६५ वर्षीय एक पुरुष र वीरगंजका ४५ वर्षीय एक पुरुष गरी तीन जनाको उपाचारको क्रममा मृत्यु भएको उनले जानकारी दिए ।

---

श्वासप्रश्वासमा समस्या भएपछि उपचारका लागि कोभिड अस्पतालमा उनीहरुलाई भर्ना गरिएको थियो । मृतकमध्ये महिलालाई भर्ना भएदेखि नै भेन्टिलेटरको आवश्यकता रहेपनि समयमा भेन्टिलेटर उपलब्ध हुन नसक्दा मृत्यु भएको डा. यादवले बताए ।

'अस्पतालमा पाँच वटा भेन्टिलेटर छन । तर त्यसमध्ये दुई वटा मात्रै संचालनमा छन् । ती भेन्टिलेटर खाली नभएको कारण दुई दिनपछि आज भेन्टिलेटरमा राख्दा पनि महिलालाई बचाउन सकिएन', उनले भने ।

त्यस्तै, जनकपुरधामका पुरुषलाई पनि समयमा भेन्टिलेरमा राख्न नसक्दा मृत्यु भएको उनले बताए । वीरगंजका पुरुषको अक्सिजन लगाएर उपचार गर्दा पनि ज्यान बचाउन नसकिएको डा. यादवले बताए ।

कोभिड अस्पतालमा हाल ३२ जना संक्रमितको उपचार भइरहेको छ । पाइपलाईनबाट अक्सिजन दिन सक्ने गरी कोभिड अस्पतालले ४१ वटा बेड तयारी अवस्थामा राखेको छ भने संघीय सरकारबाट मगाइएका आठ वटा भेन्टीलेटरको जडान कार्य जारी रहेको छ ।