कञ्चनपुरमा कोरोना संक्रमण बढ्यो

दोधारा चाँदनी- पछिल्लो एक सातायता कञ्चनपुरमा कोरोना संक्रमण बढेको छ । जिल्ला स्वास्थ्य कार्यालय कञ्चनपुरका अनुसार बुधबार मात्रै कञ्चनपुरमा १२ जनामा कोरोना संक्रमण पुष्टि भएको छ । संक्रमित हुनेमा अधिकांश भारतबाट नेपाल फर्किनेहरू छन् । 

जिल्ला स्वास्थ्य कार्यालय कञ्चनपुरका कोभिड फोकल पर्सन शिद्धराज भट्टले भारतबाट आउनेमा संक्रमण देखिएको बताए । 'पहिला जस्तो सिकिस्त बिरामी पर्ने खालको देखिएको छैन,' उनले भने, 'अहिले सीमानाका गड्डाचौकीमा भारतबाट फर्किनेमा कोरोना संक्रमण जाँच भइरहेको छ ।' 

---

यहाँको बेलौरी नगरपालिकामा सबैभन्दा बढी संक्रमित देखिएका छन् । जिल्लामा जम्मा सक्रिय संक्रमित २६ जनामध्ये २४ जना बेलौरीकै छन् । बैलौरी नगरपालिकाका स्वास्थ्य शाखा प्रमुख जयसिंह बोहराले संक्रमित हुने अधिकांश भारतबाट आएका रहेको बताए । 

'बुधबार शङ्कास्पद १६ जनाको परीक्षण गर्दा नौ जनामा संक्रमण देखिएको छ,' उनले भने, 'अहिले शङ्कास्पद बिरामीको मात्रै परीक्षण गर्ने गरेका छौँ ।'

गड्डाचौकी हेल्थ डेस्क प्रमुख प्रिति बोहराले भारतबाट आउनेमा कोरोना संक्रमण देखिएको बताए । 'बुधबार तीन जनामा संक्रमण देखिएको छ,' उनले भने, 'अहिले घर फर्किनेको सङ्ख्या कम छ ।'

बुधबार नाकामा एक सय ४९ जनाको कोरोना परीक्षण गर्दा तीन जनामा संक्रमण देखिएको हो । अहिले कञ्चनपुरमा सक्रिय संक्रमितको सङ्ख्या २६ रहेको छ ।