शनिबार सुदूरपश्चिममा २० जना संक्रमित थपिए

कैलाली – सुदूरपश्चिम प्रदेशमा शनिबार थप २० जनामा कोभिड-१९ भाइरस संक्रमण पुष्टि भएको छ । प्रदेशभर पीसीआर र एन्टिजेन विधिबाट एक हजार ९६ जनामा गरिएको परीक्षणमा सो संख्यामा संक्रमण पुष्टि भएको स्वास्थ्य निर्देशनालयले जनाएको छ । 

शनिबार संक्रमितमध्ये १८ जनामा पीसीआर र दुई जनामा एन्टिजेन विधिबाट परीक्षण गरिएको हो । पीसीआर विधिमार्फत गरिएको परीक्षणमा सेती प्रादेशिक अस्पतालमा १४ र डडेल्धुरा अस्पतालमा गरिएको चार जनामा संक्रमण पुष्टि भएको हो । एन्टिजेन विधिमार्फत गरिएको परीक्षणमा कञ्चनपुर र कैलालीका एक, एक जनामा कोभिड संक्रमण देखिएको निर्देशनालयले जनाएको छ । प्रदेशभर १४ जना संक्रमणमुक्त भएका छन् । शुक्रबार सुदूरपश्चिमका १३ जनामा संक्रमण पुष्टि हुँदा १६ जना संक्रमणमुक्त भएका थिए ।

---