ट्युसन सेन्टरका बालबालिकालाई मोर्डना खोप लगाइँदै

जुम्ला - जुम्लामा सञ्चालित ट्युसन सेन्टरका बालबालिकालाई  मोर्डना खोप लगाइने भएको छ । ट्युसन पढ्न आएका बालबालिकालाई सेन्टरमै पुगेर  खोप लगाइने भएको हो । विश्व व्यापी महामारीका रूपमा फैलिएको कोरोना भाइरस संक्रमणबाट बच्नका लागि ट्युसन सेन्टरमा अध्ययनरत बालबालिकालाई खोप लगाइने चन्दननाथ नगरपालिकाको स्वास्थ्य शाखाले बताएको छ  ।

जुम्लामा सञ्चालित पाँच वटा ट्युसन सेन्टर छन् । त्यहाँ  अध्ययनरत १२ वर्षदेखि १७ वर्ष ११ महिना २९ दिनका अर्थात् १८ वर्ष मुनिका बालबालिकालाई पहिलो डोज मोर्डना खोप लगाइने चन्दननाथ नगरपालिकाका स्वास्थ्य शाखा प्रमुख क्षेत्रबहादुर महतले  बताए ।  

---

उनका  अनुसार सोमबार ट्युसन सेन्टरमा अध्ययनरत बालबालिका सहित विद्यालय क्षेत्रभन्दा बाहिर रहेका सबै बालबालिकालाई अनिवार्य आगामी पुस २४ गतेसम्म मोर्डना खोप लगाइसकिने छ ।

मंगलबार बिहान १० बजेदेखि सबै ट्युसन सेन्टरमा गएर खोप लगाइने स्वास्थ्य संयोजक महतको भनाई छ । विद्यालयमा खोप लगाउन छुटेका १२ वर्षमाथिका १८ वर्षमुनिका सबै बालबालिकालाई खोप लगाउन सबै ट्युसन सेन्टरका सञ्चालकलाई अनुरोध गरिएको छ ।  

सरकारले जुम्लाको लागी करिब १३ हजार मोर्डना खोप पठाएको छ । जसमा यहाँका आठ स्थानीय तहमा १२ हजार २ सय ५० डोज खोप वितरण गरिएको छ । हालसम्म ५ हजार ८ सय ६९ जना बालबालिकाले खोप लगाएको जनस्वास्थ्य सेवा कार्यालय जुम्लाका प्रमुख कृष्ण सापकोटाले बताए ।

त्यस्तै प्रमुख जिल्ला अधिकारी तथा खोप कार्यक्रमका संयोजक विजयाकुमारी प्रसाईंले जिल्लामा आएको सबै खोप खपतका लागि सबै संयन्त्र जुट्नु पर्ने बताइन् ।  उनले खोप निर्धारित समय भित्र लगाइ सक्नु पर्ने र पछि मिति गुज्रिने भएकोले सबै बालबालिकालाई खोपको पहुँचमा ल्याउन योजनागत ढंगबाट अघि बढ्नु पर्ने बताइन् ।

जुम्लामा मोर्डना खोप लगाउने राष्ट्रिय लक्ष्य १३ हजार बालबालिकाको भए पनि १ सय ७० वटा सरकारी विद्यालय र निजी विद्यालयका करिब २० हजार विद्यार्थीको तथ्यांक संकलन भएको छ ।