मध्यबिन्दु अस्पतालमा आकस्मिक र प्रसूतिबाहेकका सेवा बन्द

कावासोती- जिल्ला अस्पतालका चिकित्सक तथा कर्मचारीमा कोभिड पुष्टि भएसँगै अस्पतालको सेवा बन्द गरिएको छ । नवलपरासी (बर्दघाट सुस्तापूर्व) नवलपुरको मध्यबिन्दु जिल्ला अस्पतालमा चिकित्सक तथा कर्मचारीमा कोभिड संक्रमण पुष्टि भएसँगै पाँच दिनका लागि अस्पतालका आकस्मिक र प्रसूतिबाहेक अन्य सेवा बन्द गरिएको अस्पतालका सूचना अधिकारी छविलाल सुवेदीले बताए । 

अस्पतालका कर्मचारीमा कोभिड देखिएपछि जनशक्तिको समेत अभाव भएसँगै आजदेखि यही माघ १० गतेसम्मका लागि अस्पतालबाट प्रदान गरिने आकस्मिक सेवा, प्रसूति सेवा, फार्मेसी सेवा र आकस्मिक प्रयोगशालाबाहेक सबै सेवा बन्द गरिएको सूचना अधिकारी सुवेदीले बताए । 'अस्पतालमा यसै पनि कर्मचारी अभाव थियो, त्यसमाथि केही कर्मचारीलाई कोभिड संक्रमण पुष्टि हुँदा सबै सेवा दिन सक्ने अवस्थानै भएन', सूचना अधिकारी सुवेदीले भने, 'यस कारण केही दिन आकस्मिकबाहेकका सेवा बन्द गरेका हौँ ।' 

---

जिल्ला अस्पतालमा कार्यरत २३ कर्मचारीलाई कोभिड संक्रमण पुष्टि भएको छ । बुधबार मात्रै अस्पतालका ११ जनामा कोरोना संक्रमण पुष्टि भएको सूचना अधिकारी सुवेदीले बताए । १५ शय्याको यस अस्पतालमा ३१ जनाको दरबन्दी रहेको छ ।  रासस