काठमाडौँ : चिनियाँ कम्पनीले विकास गरेको कोभिड-१९विरुद्धको खोप ‘भेरो सेल’लाई नेपालमा आपत्कालीन प्रयोगका लागि भन्दै औषधी व्यवस्था विभागले अनुमति दिएको छ । उक्त अनुमति पाएपछि खुसी व्यक्त गर्दै नेपालका लागि चिनियाँ राजदूत होउ यान्छीले आधिकारीक पत्रसहित ट्विट गरेकी छन् । चीनको सिनोफार्म अन्तर्गतको बेइजिङ इन्स्टिच्युट अफ बायोलोजिकल प्रोडक्टस कम्पनी लिमिटेड (बीआईबीपी) ले उत्पादन गरेको खोपलाई अनुमति दिइएकोे विभागले बुधबार सूचना जारी गर्दै जनाएको छ ।

चीनले नेपाललाई पाँच लाख डोज खोप अनुदानमा उपलब्ध गराउने जानकारी दुई मुलुकका परराष्ट्र मन्त्रीबीच भएको टेलिफोन वार्तापछि जारी विज्ञप्तीमा उल्लेख छ । यसअघि चिनियाँ दूतावासले एक विज्ञप्ती जारी गर्दै नेपाललाई ३ लाख डोज खोप अनुदानमा दिने उल्लेख गरेको थियो ।

---

नेपालमा यतिबेला भारतको सिरम इन्स्टिच्युटको ‘कोभिसिल्ड’ खोप लगाउन थालेको पनि तीन साता भइसकेको छ । विभागले भारतमा उत्पादित खोपलाई आपत्कालीन प्रयोगको अनुमति दिए लगत्तै भारतबाट अनुदानमा माघ दोस्रो साता नरेन्द्र मोदी सरकारले १० लाख डोज खोप उपलब्ध गराएको थियो । सरकारले थप दशलाख डोज कोभिसिल्ड खोप भारतबाट चार डलरमा प्रति खोप खरिद गर्ने भएको छ ।   

Glad to hear that DDA of Nepal has granted emergency use approval to China's Sinopharm vaccine. I hope and believe that the China-aid vaccines will contribute to Nepal's fight against the COVID-19 pandemic soon!👏👏 pic.twitter.com/8aBDRT0k9e

— Ambassador Hou Yanqi (@PRCAmbNepal) February 18, 2021