के नेपाल यू-१९ महिला विश्वकपमा छनोट हुने सम्भावना छ ?

काठमाडौँ - आईसीसी यू-१९ महिला टी-ट्वान्टी विश्वकप एसिया छनोटअन्तर्गत नेपालले तीन खेल खेलिसक्दा २ खेलमा जित र १ खेलमा पराजय भोगेको छ । नेपालले कतार र भुटानलाई पराजित गर्दा युएईसँग हार्न पुगेको छ । 

६ टिमको सहभागिता रहेको छनोटमा नेपालले अब केवल थाइल्यान्ड र आयोजक मलेसियासँग खेल्न बाँकी छ । अहिलेको अवस्थामा नेपालले ४ अंक जोडेको र उसले बाँकी दुबै खेल जितेमा ८ अंक हुन्छ । नेट रनरेट भने खेलपछि नै टुंगो लाग्नेछ । 

---

अर्कोतर्फ युएई र थाइल्यान्डले खेलेका तीनवटै खेलमा जित हात पारेका छन् । दुवै टोलीले समान ३ खेलबाट समान ६-६ अंक जोडेका छन् तर नेट रनरेटमा भने युएई धेरै माथि छ । 

आगामी वर्ष दक्षिण अफ्रिकामा हुने यू-१९ विश्वकपका लागि यस छनोट प्रतियोगिताबाट केवल एक टिमले स्थान बनाउनेछ । यसको अर्थ राउन्ड रोविनको आधारमा जारी छनोटमा शीर्ष स्थानमा रहने टोलीले नै दक्षिण अफ्रिकाको टिकट काट्ने छ । 

त्यसो भए नेपालको सम्भावना कस्तो छ ? 

नेपालले अब आफ्ना दुवै (थाइल्यान्ड र मलेसिया) देशलाई पराजित गर्नुपर्छ भने युएईले बाँकी दुबै खेलमा पराजय भोग्नुपर्नेछ । अर्कोतर्फ युएई र थाइल्यान्डबीचको खेल हुन बाँकी रहेकाले थाइल्यान्डले युएईलाई पराजित गर्दा झिनो अन्तरको जितका लागि नेपालले अपेक्षा राख्नुपर्नेछ । अन्यथा नेट रनरेटमा नेपाल पछि पर्न सक्छ ।

तर उत्कृष्ट प्रदर्शन गर्दै आएको युएईले थाइल्यान्डबाहेक तुलनात्मक रुपमा कमजोर मानिएको कतारसँग खेल्न बाँकी छ । कतारले खेलेका तीनवटै खेलमा पराजय भोगेका कारण कतारले युएईलाई पराजित गर्ने सम्भावना कम छ । 

अहिलेको अवस्था हेर्ने हो भने युएई र थाइल्यान्ड नै विश्वकपमा छनोट हुने प्रमुख दावेदार टोली हुन् ।