क्रिकेट विश्वकप लिग-२: नेपाल र ओमानबीच आज खेल हुँदै

काठमाडौँ – आईसीसी पुरुष क्रिकेट विश्वकप लिग-२ त्रिकोणात्मक एकदिवसीय सिरिज अन्तर्गत नेपालले आज ‌ओमानको सामना गर्दै छ । नेपाल र ओमानबीचको खेल अमेरिकाको पियरल्यान्डमा नेपाली समय अनुसार राति ९:१५ बजे सुरु हुनेछ । 

घरेलु टोली अमेरिका, नेपाल र ओमानबीच जारी सिरिजमा ओमानले अन्तिम खेल खेल्दैछ । त्यतिमात्र नभएर ओमानले नेपालविरुद्ध खेल्दै लिग-२ को ३६ खेलको यात्रा पनि टुंग्याउने छ । 

---

यता नेपालले सिरिज अन्तर्गत अमेरिकासँग एक खेल खेल्न बाँकी छ भने लिग-२ मा भने ओमानसँग खेल्दा नेपालको १५ औँ खेल हुनेछ । 

लिगको अंक तालिकामा ओमान ३५ खेलबाट ४४ अंक ल्याउँदै शीर्ष स्थानमा रहेको छ । यता नेपालले भने १४ खेलबाट जम्मा १३ अंक जोडेको छ । सात टिमको सहभागिता रहेको तालिकामा नेपाल छैटौं स्थानमा छ । 

अमेरिकामा जारी त्रिकोणात्मक सिरिज अन्तर्गत ओमानले तीन मध्ये दुई खेलमा जित हात पारेको छ भने एक खेलमा पराजय भोगेको छ । यता नेपालले खेलेको दुई मध्ये एक खेलमा पराजय भोग्दा एक खेल ‘टाई’ भएको थियो । 

आजको खेलमा जित हात पारे नेपाल लिग तालिकाको पाँचौं स्थानमा उक्लिनेछ किनभने पाँचौं स्थानमा रहेको नामिवियाको १४ अंक छ ।