सन्दीप र रोहितको एकदिवसीय वरियतामा सुधार

काठमाडौँ – नेपाली क्रिकेट टिमका कप्तान सन्दीप लामिछाने र ब्याट्सम्यान रोहित कुमार पौडेलको आईसीसीकाे एकदिवसीय वरियतामा सुधार भएको छ । आईसीसीको नयाँ वरियता अनुसार एकदिवसीय बलिङको वरियतामा सन्दीपको एक स्थान सुधार भएको छ ।

सन्दीप ४४ औँ स्थानबाट एक स्थानमाथि ४३ औँ स्थानमा उक्लिएका छन् । बलिङतर्फ न्यूजिल्यान्डका ट्रेन्ट बोल्ट शीर्ष स्थानमा रहेका छन् । अष्ट्रेलियाका जोश ह्याजलउड दोस्रो तथा न्यूजिल्यान्डका म्याट हेनरी तेस्रो स्थानमा छन् । 

---

ब्याटिङतर्फ भने रोहित पनि एक स्थानमा माथि उक्लिएका छन् । रोहित ८३ औँ स्थानबाट ८२ औँ स्थानमा उक्लिएका हुन् ।

ब्याटिङतर्फ पाकिस्तानका बाबर आजम शीर्ष स्थान तथा इमाम उल हक दोस्रो स्थानमा रहेका छन् । भारतीय ब्याट्सम्यान विराट कोहली तेस्रो स्थानमा छन् ।