एसीसी टी-ट्वान्टीः नेपालको उत्कृष्ट सुरुवात, संगिताले लिइन् ४ विकेट

काठमाडौँ – मलेसियामा शुक्रबारबाट सुरु भएको एसीसी महिला टी-ट्वान्टी च्याम्पियनशीपमा नेपालले उत्कृष्ट सुरुवात गरेको छ । नेपालले पहिलो खेलमा भुटानलाई ५० रनले पराजित गरेको हो । 
९५ रनको लक्ष्य पछ्याएको भुटान १७ ओभर ५ बलमा ४४ रनमै सिमित भयो । भुटानका लागि छिरिङ जाङ्मोले सर्वाधिक १६ रन जोडिन् । नेपालका लागि संगिता राईले सर्वाधिक ४ विकेट लिदाँ कविता कुँवर र सिता रानामगर समान २-२ विकेट हात पारे । इन्दु बर्मा र अस्मिना कर्माचार्य १-१ विकेट लिए ।  

यसअघि मलेसियास्थित युकेएम-वाईयसडी क्रिकेट ओभलमा टस जितेर पहिले ब्याटिङ गर्दै नेपालले निर्धारित २० ओभरमा ९ विकेट गुमाएर ९४ रन बनायो । नेपालका लागि काजल श्रेष्ठले सर्वाधिक २६ रन तथा कप्तान रुविना क्षेत्रीले २१ रनको योगदान गरे । इन्दु बर्माले २० रन, डोली भट्टले ५, सिता रानामगरले ४, ममता चौधरीले ३ र विन्दु रावलले १ रन जोडे । 

---

भुटानका लागि सोनाम पाल्डोनले ४ तथा अन्जु गुरुङ र टासी चेकीले १-१ विकेट हात पारे । 

नेपालले दोस्रो खेल शनिबार कुवेतविरुद्ध खेल्नेछ । 

च्याम्पियनसिपमा १० टिमको सहभागिता रहको छ । च्याम्पियनसिपमा आयोजक मलेसियासहित नेपाल, बहराइन, भुटान, हङकङ, कुवेत, सिंगापुर, ओमान, कतार र संयुक्त अरब इमिरेट्स (युएई) रहेका छन् । 

सहभागी १० टोलीलाई दुई समूहमा विभाजन गरिएको छ । जसअन्तर्गत नेपाल समूह ‘बी’ मा रहेको छ । नेपाल सम्मिलित समूहमा बहराइन, भुटान, हङकङ र कुवेत रहेका छन् । यस्तै समूह ‘ए’ मा मलेसिया, ओमान, कतार, सिंगापुर र युएई रहेका छन् । 

समूह चरणको खेलपछि दुबै समूहका शीर्ष दुई टोली सेमिफाइनलमा प्रवेश गर्नेछन् । फाइनलमा प्रवेश गर्ने दुई टोली अक्टोबरमा आयोजना हुने महिला टी–२० एसिया कपका लागि छनोट हुनेछन् ।