लिग-२ : नेपालले सोमबार नामिवियाविरुद्ध खेल्ने

काठमाडौँ – आईसीसी पुरुष क्रिकेट विश्वकप लिग-२ अन्तर्गत स्कटल्यान्डमा जारी त्रिकोणात्मक एकदिवसीय सिरिजको आफ्नो पहिलो खेलमा नेपालले सोमबार नामिवियाको सामना गर्ने भएको छ ।

नेपाल र नामिवियाबीचको खेल न्यू काम्बुसडुन ग्राउन्डमा नेपाली समय अनुसार दिउँसो ३:४५ बजे सुरु हुनेछ । नामिवियाविरुद्ध खेल्दा नेपालले लिग-२ अन्तर्गतको १७ औँ खेल खेल्ने छ भने नामिवियाको १६ औँ खेल हुनेछ । नामिवियाले आइतबार आयोजक स्कटल्यान्डविरुद्ध खेल्दैछ । 

---

सिरिज अन्तर्गत नेपालले दोस्रो खेल स्कटल्यान्डविरुद्ध जुलाई १३, तेस्रो खेल नामिवियाविरुद्ध जुलाई १६ तथा अन्तिम खेल स्कटल्यान्डविरुद्ध जुलाई १७ मा खेल्नेछ । 

सात टिमको सहभागिता रहेको लिगमा १६ खेलबाट १५ अंक जोडेको नेपाल पाँचौं स्थानमा रहेको छ भने स्कटल्यान्ड २० खेलबाट २८ अंकसहित दोस्रो स्थानमा छ । नामिविया भने १४ खेलबाट समान १४ अंकसहित छैटौं स्थानमा छ । 

सम्पूर्ण ३६ खेल खेलेको ओमान ४४ अंकसहित शीर्ष स्थानमा रहँदा युएई २२ खेलबाट २६ अंक जोड्दै तेस्रो स्थानमा छ । यता २४ खेलमा २३ अंक रहेको अमेरिका चौथों तथा २० खेलबाट २ अंक मात्र जोडेको पपुवा न्यूगिनी सातौं स्थानमा छ ।