सफिकले १६० रन जोड्दा श्रीलंकामाथि पाकिस्तानको जित

काठमाडौँ- पाकिस्तानले घरेलु टोली श्रीलंकाविरुद्धको पहिलो टेष्ट क्रिकेट खेल ४ विकेटले जितेको छ । जितसँगै दुई खेलको सिरिजमा पाहुना टोली पाकिस्तानले १-० को अग्रता बनाएको छ ।

जितका लागि चाहिएको ३ सय ४२ रनको लक्ष्य पाकिस्तानले ६ विकेट गुमाएर पूरा गर्‍यो । पाकिस्तानलाई जित दिलाउन दोस्रो इनिङ्समा अब्दुल्लाह सफिकले अविजित १ सय ६० रनको योगदान गरे । कप्तान बाबर आजमले ५५ रन जोडे । श्रीलंकाका प्रभात जयसुर्याले सर्वाधिक ४ विकेट हात पारे ।   

---

यसअघि टस जितेर पहिले ब्याटिङ गरेको श्रीलंकाले पहिलो इनिङ्समा २ सय २२ रन जोडेको थियो । उसका लागि दिनेश चन्डिमलले सर्वाधिक ७६ रन बनाए । पाकिस्तानका सहिन शाह अफ्रिदीले सर्वाधिक ४ विकेट हात पारे ।

जवाफमा पाकिस्तानले पहिलो इनिङ्समा २ सय १८ रन मात्र जोडेको थियो । जसमा कप्तान बाबर आजमले १ सय १९ रनको योगदान गरेका थिए । श्रीलंकाका प्रभात जयसुर्याले ५ विकेट लिएका थिए ।

दोस्रो इनिङ्समा भने श्रीलंकाले ३ सय ३७ रन जोडेपछि पाकिस्तानले ३ सय ४२ रनको लक्ष्य पाएको थियो । श्रीलंकाका लागि दिनेश चन्डिमलले अविजित ९४ तथा कुशल मेन्डिसले ६४ रनको योगदान गरेका थिए । पाकिस्तानका मोहम्मद नवाजले सर्वाधिक ५ विकेट लिएका थिए ।