दुई नेपाली क्रिकेटर आज राति केन्या पुग्दै, सिरिज समयमै हुने

काठमाडौँ- नेपाल र घरेलु टोली केन्याबीचको पाँच खेलको टी-ट्वान्टी अन्तर्राष्ट्रिय सिरिज समयमै हुने भएको छ । सोमपाल कामी र विवेक यादव बुधबार केन्याका लागि प्रस्थान गर्नुका साथै उनीहरु बुधबार राति नै केन्या पुग्ने भएपछि सिरिज तोकिएकै समयमा हुने भएको छ । 

टी-ट्वान्टी सिरिजको पहिलो खेल बिहीबार हुने तालिका रहेको छ । तर भिसाका कारण पाँच खेलाडीसहित सात जना केन्या उड्न नपाएपछि नेपाल र केन्याबीचको टी-ट्वान्टी अन्तर्राष्ट्रिय सिरिज समयमै नहुने आशंका उत्पन्न भएको थियो । 

---

तर नेपाल क्रिकेट संघ (क्यान) का कार्यवाहक सचिव प्रशान्त विक्रम मल्लले सोमपाल र विवेक बुधबार केन्याका लागि उडेका तथा अन्य पाँच जना बुधबार रातिसम्म उड्ने सम्भावना रहेको बताउँदै उनले सिरिज समयमै हुने जनाए । 

‘सोमपाल र विवेक उडिसके तथा उनीहरु बुधबार राति नै त्यहाँ पुग्नेछन् । त्यसैगरी अन्य पाँच जना पनि बुधबार राति नै त्यसतर्फ प्रस्थान गर्ने सम्भावना रहेको छ । केन्याको क्रिकेट बोर्डले यसका लागि प्रयास गरिरहेको छ,’ मल्लले इकागजलाई बताए । 

समयमै भिसा नआएपछि बसिर अहमद, शाहब आलम, आदिल अलाम, विवेक यादव र सोमपाल कामी भने जान पाएका थिएनन् । त्यसैगरी व्यवस्थापक सुनील महासेठ तथा भारतीय ट्रेनर अब्दुल सतार पनि भिसा नआएपछि त्यसतर्फ प्रस्थान गर्न पाएनन् ।

नेपालले केन्याबीचको अन्य चार खेल अगस्ट २६, २८, २९, ३० मा खेलिने तालिका रहेको छ । टी-ट्वान्टीपछि नेपाल र केन्याबीच सेप्टेम्बर २, ३ र ५ मा तीन खेलको एकदिवसीय सिरिज हुने तालिका रहेको छ ।