एसिया कपः श्रीलंकामाथि अफगानिस्तानको शानदार जित

काठमाडौँ- एसिया कपको उद्घाटन खेलमा अफगानिस्तानले श्रीलंकामाथि शानदार जित दर्ता गरेको छ । युएईको दुबई इन्टरनेसनल क्रिकेट स्टेडियममा शनिबार राति भएको खेलमा अफगानिस्तानले श्रीलंकालाई ८ विकेटले पराजित गरेको हो ।

समूह ‘बी’ अन्तर्गतको खेलमा श्रीलंकाले दिएको १ सय ६ रनको सामान्य लक्ष्य अफगानिस्तानले १० ओभर २ बलमा केवल २ विकेट गुमाएर पुरा गर्‍यो । अफगानिस्तानको जितमा रहमानुल्लाह गुरवाजले १८ बलमा ३ चौका र ४ छक्काको मदतमा सर्वाधिक ४० रनको योगदान गरे । हजरतुल्लाह जाजाईले २८ बलमा ३७ रन जोड्दा ५ चौका र १ छक्का हिर्काए ।

---

यसअघि टस हारेर पहिले ब्याटिङ गरेको श्रीलंका १९ ओभर ४ बलमा अलआउट हुँदै १ सय ५ रनमा सिमित भयो । श्रीलंकाका लागि भानुका राजापाक्षाले सर्वाधिक ३८ तथा चामिका कारुणारत्नेले ३१ रन जोडे ।

अफगानिस्तानका लागि फजलहक फारुकीले सर्वाधिक ३ विकेट हात पारे । आइतबार समूह ‘ए’ मा रहेका पाकिस्तान र भारतबीच खेल हुनेछ ।