काठमाडौँ- सन् २०२४ मा वेस्ट इन्डिज र अमेरिकामा हुने आईसीसी टी-ट्वान्टी विश्वकप क्रिकेटका लागि स्वतः छनोट हुने सम्भावना कम हुँदै गएको छ । अन्तर्राष्ट्रिय क्रिकेट परिषद् (आईसीसी) ले जारी गरेको नयाँ टी-ट्वान्टी अन्तर्राष्ट्रिय वरीयता अनुसार नेपाल थप एक स्थान तल झरेपछि नेपालको विश्वकपका लागि स्वतः छनोट हुने सम्भावना कम हुँदै गएको हो । 

नयाँ वरीयता अनुसार नेपाल एक स्थान तल १५ औँ स्थानमा पुगेको छ । नामिबिया भने १४ औँ स्थानमा उक्लिएका छन् । 

---

आईसीसीले जनाए अनुसार २०२४ को विश्वकपमा २० टिमको सहभागिता रहेपनि १२ टिम स्वतः स्थान सुनिश्चित गर्नेछन् । यसै वर्षको अक्टोबर र नोभेम्बरमा अष्ट्रेलियामा हुने टी-ट्वान्टी विश्वकपमा शीर्ष ८ स्थानमा रहने टिम सिधै विश्वकपमा स्थान सुरक्षित गर्नेछन् ।

अर्कोतर्फ आयोजकको नाताले अमेरिका र वेस्ट इन्डिज विश्वकपमा छनोट भइसकेका छन् । त्यसैगरी, सन् २०२२ को नोभेम्बर १४ सम्म आईसीसीको वरीयताका आधारमा थप दुई टिम विश्वकपका लागि छनोट हुनेछन् । 

बाँकी आठ टिमका लागि छनोट प्रतियोगिताहरू हुनेछन् । त्यसमध्ये एसियाबाट दुई टिम विश्वकपमा स्थान बनाउनेछन् ।