एक खेलअगावै केन्याविरुद्धको सिरिज जित्ने नेपालको लक्ष्य

काठमाडौँ- नेपाल र घरेलु टोली केन्याबीचको पाँच खेलको टी-ट्वान्टी अन्तर्राष्ट्रिय सिरिजको चौथों खेल आज हुँदैछ । नेपाल र केन्याबीचको खेल नैरोबीको जिमखाना क्रिकेट स्टेडियममा नेपाली समय अनुसार दिउँसो ३:४५ बजे सुरु हुनेछ ।

आजको खेल दुवै टिमका लागि महत्वपूर्ण रहनेछ किनभने यसअघिका तीनमध्ये दुई खेल नेपालले जितेको छ र आजको खेल जितेको खण्डमा नेपालले एक खेलअगावै सिरिज आफ्नो पोल्टामा पार्नेछ । 

---

जबकी केन्याले केवल एक खेलमा जित हात पारेको छ र आजको खेल जित्दै घरेलु टोली सिरिज विजेताको टुंगो अन्तिम खेलबाट मात्र लगाउने लक्ष्यमा हुनेछ ।

सिरिजको पहिलो खेलमा नेपालले केन्यालाई पाँच विकेटले पराजित गर्दा दोस्रो खेल भने केन्याले रनले जितेको थियो । दोस्रो खेलमा नेपालको ब्याटिङ चल्न सकेको थिएन । 

जबकी तेस्रो खेल नेपालले ब्याटिङकै भरमा ४ विकेटले जितेको थियो । तेस्रो खेलमा ज्ञानेन्द्र मल्लले ४१ बलमा ४ चौका र १ छक्का सहित सर्वाधिक ४६ रन बनाए । 

त्यसैगरी, नेपालका लागि टी-ट्वान्टी अन्तर्राष्ट्रियमा डेब्यु गरेका विकेटकिपर ब्याट्सम्यान अर्जुन साउदले ३१ बलमा ३५ रनको योगदान गर्दा २ चौका र ३ छक्का हिर्काए । नेपालका लागि ओपनिङ गर्न आएका साउदले उत्कृष्ट ब्याटिङ गर्दै डेब्यु खेललाई यादगार बनाए ।