मार्क बाउचर मुम्बई इन्डियनको मुख्य प्रशिक्षक नियुक्त

काठमाडौँ- इन्डियन प्रिमियर लिग (आईपीएल) को सबैभन्दा सफल टिम मुम्बई इन्डियन्सले सन् २०२३ को आईपीएलका लागि मार्क बाउचरलाई मुख्य प्रशिक्षक नियुक्त गरेको छ । दक्षिण अफ्रिकाका पूर्व विकेटकिपर ब्याट्सम्यान बाउचरले अर्को महिनादेखि सुरु हुने आईसीसी टी-ट्वान्टी विश्वकपपछि दक्षिण अफ्रिकी टिमको मुख्य प्रशिक्षक पद छाड्ने भएपछि मुम्बईले उनलाई प्रशिक्षक नियुक्त गरेको आईएएनएसले जनाएको छ ।

मुम्बईले पाँच पटकका आईपीएलको उपाधि जितेको छ । खेल जीवनबाट सन्न्यास लिएपछि बाउचरले दक्षिण अफ्रिकी टिम टाइटन्सको प्रशिक्षक बन्दै टाइटन्सलाई पाँच पटक दक्षिण अफ्रिकाको फ्रेन्चाइज लिगको उपाधि दिलाए ।

---

सन् २०१९ मा बाउचर दक्षिण अफ्रिकाको मुख्य प्रशिक्षकमा नियुक्त भएका थिए । उनले दक्षिण अफ्रिकालाई ११ टेष्ट, १२ एकदिवसीय र २३ टी-ट्वान्टी खेलमा विजयी बनाएका थिए ।