पाकिस्तानविरुद्धको सिरिजमा इंग्ल्यान्डलाई अग्रता

काठमाडौँ- घरेलु टोली पाकिस्तानविरुद्धको सात खेलको टी-ट्वान्टी सिरिजमा इंग्ल्यान्डले १-० को अग्रता लिएको छ । मंगलबार राति कराँचीमा भएको पहिलो खेल इंग्ल्यान्डले ६ विकेटले जित्दै सिरिजमा अग्रता बनाएको हो ।

पाकिस्तानले दिएको १ सय ५९ रनको लक्ष्य इंग्ल्यान्डले ४ विकेट गुमाउँदै १९ ओभर २ बलमा पुरा गर्‍यो । इंग्ल्यान्डको जितमा एलेक्स हेल्सले सर्वाधिक ५३ रन तथा ह्यारी ब्रुकले अविजित ४२ रनको योगदान गरे । पाकिस्तानका लागि उसमान कादिरले सर्वाधिक २ विकेट लिए ।

---

यसअघि टस हारेर पहिले ब्याटिङ गर्ने निम्तो पाएको पाकिस्तानले निर्धारित २० ओभरमा ७ विकेट गुमाएर १ सय ५८ रन जोड्यो । पाकिस्तानका लागि मोहम्मद रिजवानले सर्वाधिक ६८ रन जोडे । कप्तान बाबर आजमले ३१ रन बनाए । इंग्ल्यान्डका लागि ल्युक उडले सर्वाधिक ३ तथा आदिल रसिदले २ विकेट लिए ।

यी दुई टोलीबीचको दोस्रो खेल बिहीबार कराँचीमै हुनेछ ।