टी-ट्वान्टी विश्वकपः इंग्ल्यान्ड सेमिफाइनलमा

काठमाडौँ- श्रीलंकालाई ४ विकेटले पराजित गर्दै इंग्ल्यान्डले अस्ट्रेलियामा जारी आईसीसी टी-ट्वान्टी क्रिकेट विश्वकपको सेमिफाइनलमा स्थान सुरक्षित गरेको छ ।

समूह एक अन्तर्गत समान सात अंक जोडेपनि नेट रनरेटमा अस्ट्रेलियालाई पछि पार्दै इंग्ल्यान्ड अन्तिम चारमा प्रवेश गरेको हो ।

---

यस समूहबाट सात अंक जोड्दै राम्रो नेट रनरेटका आधारमा न्यूजिल्यान्डले यसअघि नै सेमिफाइनलमा स्थान सुरक्षित गरिसकेको थियो ।

सेमिफाइनलमा स्थान बनाउन श्रीलंकाले दिएको १ सय ४२ रनको लक्ष्य इंग्ल्यान्डले १९ ओभर ४ बलमा ६ विकेट गुमाएर पुरा गर्‍यो ।  

श्रीलंकाविरुद्ध इंग्ल्यान्डलाई जित दिलाउन अलेक्स हेल्सले सर्वाधिक ४७ रन तथा बेन स्टोक्सले ४२ रनको योगदान गरे ।

यसअघि टस जितेर पहिले ब्याटिङ गर्ने निर्णय गरेको श्रीलंकाले निर्धारित २० ओभरमा ८ विकेट गुमाएर १ सय ४१ रन जोडेको हो ।

श्रीलंकाका लागि पाथुम निसांकाले ४५ बलमा ६७ रनको योगदान गर्दा ६ छक्का र २ चौका हिर्काए । इंग्ल्यान्डका लागि मार्क उडले सर्वाधिक ३ विकेट लिए ।