टी-ट्वान्टी विश्वकपः पाकिस्तान र न्यूजिल्यान्ड भिड्दै

काठमाडौँ- अस्ट्रेलियामा जारी आईसीसी टी-ट्वान्टी क्रिकेट विश्वकपको पहिलो सेमिफाइनल खेल आज हुँदैछ । न्यूजिल्यान्ड र पाकिस्तानबीचको पहिलो सेमिफाइनल खेल सिड्नीमा नेपाली समय अनुसार १:४५ बजेबाट सुरु हुनेछ ।

सुपर १२ अन्तर्गत समूह एकको विजेताको रुपमा न्यूजिल्यान्डले सेमिफाइनलको यात्रा तय गर्दा पाकिस्तान भने समूह दुईको उपविजेता बनेको थियो ।

---

समूह एकमा न्यूजिल्यान्ड, इंग्ल्यान्ड र आयोजक अस्ट्रेलियाले समान ७ अंक जोडेपनि नेट रनरेटका आधारमा न्यूजिल्यान्ड पहिलो तथा इंग्ल्यान्ड दोस्रो हुँदै सेमिफाइनलमा प्रवेश गर्‍यो ।

न्यूजिल्यान्डले ५ मध्ये ३ खेल जित्दै एक खेलमा पराजित हुँदा एक खेलमा अंक बाडेको थियो ।

अर्कोतर्फ समूह दुईमा पाकिस्तानले खेलेका ५ मध्ये ३ खेलमा जित तथा २ खेलमा पराजित हुँदै ६ अंकका साथ समूहको उपविजेताको रुपमा अन्तिम चारमा स्थान सुरक्षित गरेको थियो । भारतले भने ५ मध्ये ४ खेलमा जित तथा १ पराजयसँगै ८ अंक जोडेर समूहमा पहिलो हुँदै सेमिफाइनलमा प्रवेश गरेको थियो ।

भारत र इंग्ल्यान्डबीचको दोस्रो सेमिफाइनल खेल भने बिहीबार हुनेछ ।