पुलिसलाई हराउँदै आर्मी फाइनलमा, दिपेन्द्रको शतक र करणको ६ विकेट गयो खेर

काठमाडौँ- नेपाल पुलिस क्लबलाई २ विकेटले पराजित गर्दै त्रिभुवन आर्मी क्लब पीएम कप एकदिवसीय क्रिकेट प्रतियोगिताको फाइनलमा प्रवेश गरेको छ । आर्मीले अब उपाधिका लागि फाइनलमा नेपाल एपीएफ क्लबविरुद्ध खेल्नेछ ।

शुक्रबार भएको दोस्रो सेमिफाइनल खेलमा पुलिसले दिएको ३ सय ५ रनको लक्ष्य आर्मीले एक बल बाँकी छँदै ८ विकेट गुमाएर पुरा गर्‍याे । आर्मीलाई फाइनलमा पुर्‍याउन रोहित पौडेलले सर्वाधिक ८९ रनको योगदान गर्दा हरि चौहाले ७५ तथा राजेश पुलामीले ४३ रनको योगदान गरे ।

---

पुलिसका लागि करण केसीले सर्वाधिक ६ विकेट लिए ।

यसअघि टस हारेर पहिले ब्याटिङ गरेको पुलिसले निर्धारित ५० ओभरमा ४ विकेट गुमाएर ३ सय ४ रन जोड्यो ।

पुलिसका लागि कप्तान दिपेन्द्र सिंह ऐरीले १ सय २५ बलमा ५ छक्का र ११ चौकाको मदतमा सर्वाधिक १ सय ४० रनको योगदान गरे । आरिफ शेखले अविजित ९१ रन जोडे । आरिफले अन्तिम ओभरमा कुशल मल्ललाई २२ रन प्रहार गरे । दिपेन्द्र र आरिफशले चौथो विकेटका लागि २ सय ४ रनको साझेदारी गरे ।

आर्मीका लागि विक्रम सोबले सर्वाधिक ३ विकेट लिए । सुशान भारीले एक विकेट लिए ।