नेपाल टी-ट्वान्टीः काठमाडौँ नाइट्सको विजयी सुरुवात

काठमाडौँ- आजबाट सुरु भएको नेपाल टी-ट्वान्टी क्रिकेट लिगमा काठमाडौँ नाइट्सले विजयी सुरुवात गरेको छ । त्रिवि क्रिकेट मैदानमा पोखरा एभेन्जर्सलाई २६ रनले पराजित गर्दै काठमाडौँले विजयी सुरुवात गरेको हो ।

काठमाडौँले दिएको १ सय ६३ रनको लक्ष्य पछ्याएको पोखराले निर्धारित १९ ओभरमा ७ विकेट गुमाउँदै केवल १३६ रन मात्र जोड्न सक्यो ।

---

पोखराका लागि उपुल थरंगाले सर्वाधिक ४४ रन तथा आरिफ शेखले २० रन बनाए । काठमाडौँका लागि अविनाश बोहराले सर्वाधिक ३ तथा बसिर अहमदले २ विकेट लिए ।

यसअघि टस हारेर पहिले ब्याटिङ गरेको काठमाडौँले तोकिएको १९ ओभरमा ५ विकेट गुमाएर १ सय ६२ रन जोड्यो ।

काठमाडौँका लागि अजमातुल्लाह ओमारजाईले ४२ बलमा अविजित रहँदै सर्वाधिक ८५ रनको योगदान गरे । अफगानिस्तानका युवा अलराउन्डर ओमरजाईले ३ चौका र ७ छक्का हिर्काए ।

सुनम गौतमले २७ तथा अलेक्स ब्लेकले २१ रन बनाए ।

पोखराका प्रतिश जिसी र जाहिर खानले समान २-२ विकेट हात पारे ।